dins ché dunes partie 4

yavo un aut' indrot qu in avo ker aller mais là chéto l aventure ....

eune fo arrivés in haut des dunes, nos parints respectifs croyottent qu in juo juste après, mais là in avo un aut' plan en tiete

sur qu in jouo aux coboles, mais là in allo vive eune grande aventure ...

l' but chéto d aller jusqu au "rio grande", l' rio grande , savez l' riviere qu ale fait la frontiere entre les états unis d un coté, territoire des bons coboles, et le mexique , du qui yavo que des méchants ...mexicains , avec des grands sombreros, pi aussi des indiens apaches qui s y étotent réfugies pour echapper à l armée américaine

donc quand qu in juo au "rio grande" , in s éto bin sur inspirés d eune des aventures de rintintin

et là in s'distribuo les roles , quand que j' dis "distribuer" ch'éto min cousin, plus agé qu' mi qui déchido...

donc ch'éto li qui éto ripp masters, ch' lieutenant, et mi ...j éto le sergent ohara, meme si j avo pas trop ker, alors y a des coups j' préféro et' un éclaireur indien ...

not' rio grande à nous, chéto loin d ete bucolique, ch'éto meme un indrot qu in devo pas aller, mais comme vous l' savez , si ch'est interdit , raison d' plus pour y aller

in juro bin sur qu in l' diro pas à nos parints, et eune fo ,in haut del dune, in resto l' plus longtimps su les cretes, pour pas perde d' temps

pasque nous, ché espécialistes du désert du colorado, in savo que si in dévalo l' grante cote, in allo perde du temps et' d l énergie à l armonter un peu plus loin ...

in resto grinmint su les cretes, su not' droite in véyo ch' fameux chateau d io, et les tchiotes carettes qui étotent su la route ente merlimont et stella

et plus loin , les collines du coté d'montreul, mais là ch'éto pu les dunes

in face, in voyo les batimints de stella plache, les seuls à l époque qu in pouvo vire ch'éto ceux du bord d' plache, j' parle du temps du que tout chte zone près d' la mer que chéto cor pas trop bin aménagé

plus loin mais que par bio temps in voyo s élever les contreforts d' ché falaises, boulone ch'éto dins ch' coin là

comme diso min mononque, quand que té vo cha bin dégagé, ch'est signe qui va dracher dins les jurs qui suiffent

vous m' direz, mais j' su petete mauvaise lanque, i dracho quand meme souvint su la cote d opale ....

derriere nous in laisso , la "civilisation", merlimont , ses villas, sin clocher caractéristique , eune vraie fleche qui parto fierm'int vers le ciel

le décor y est dréché, mais in avo pas trop l' temps d' le contempler, in avo del route à faire ...

faudro ptete que j' vous disse du qui éto et quo qu chéto ch' fameux rio grande

bon in va faire un tchiot retour en arriere.... au miyeu des années 60, yavo , entre merlimont et stella, eune nouvelle station balnéaire qui éto en cours de construction

ale s appello garden plage, y a bin eu queques masons d' construites, j' me deminte si y a pas eu eune station service ou un restaurant ou alors chéto au meme indro, qui avo été construit

d' ailleurs ch'est à cht' occasion là, qu in a construit l' route direque entre merlimont et stella

avant fallo arvenir à merlimont villache, printe par cucq et armonter pour arriver à stella, sacré détour

mais garden plache, cha a capoté, am' mote ch'éto trop près des 2 estations

mais ché gins qui avotent des masons, zallez vite comprinte,yavo pas d' tout à l égout

donc entre merlimont et stella, yavo, un ruisseau qui parto de garden plage, qui traveso ché dunes et qui déboucho sul' plage , commint vous dire ?

voyez du qui yavo , j' sais pu si y existe cor, entre merlimont et stella, un tout tchiot blockauss, in in voyo pu que le haut d' la tourelle, à mi distance

ch'est là que les zio d' vaisselles, d' buée, ale zarrivotent ....

l' temps qu' je vous a décrit tout cha, in n' a profité avec min cousin , à dévaler à armonter ché cretes, à ardéchinte par un tchiot passache entre ché zarbustes piquants ...

pour arriver à eune série d' dunes , pas très hautes, mais parrallèles, qu in devo grimper , ardéchinte, grimper ardéchinte ..

in s arreto pour arprinte not' souffe, croyez pas qu in éto perdu, in connaisso ché coins là comme not' poque ....

l' sape dins ché creux, éto plus frod, plus fin, in s'servo d' nos mains pour armonter plus vite d' l aut 'coté

su not'droite ,l' grante dune qu in pouvo y passer à not' grante tristesse

immense dune, que pour qu ale reste in plache, yavo eu grinmint d' plantations d oyats, et de haies en espece d' brandes, pour artenir au maximum , ch' sape

mais que chéto devenu interdit d' passer par là et qu in plus cha nous auro ralenti

j' parle , j' parle, mais cha y est in y allo y arriver à not' rio grandé

prudents comme in éto, in s arreto cent metes avant, pour éxaminer les invirons

bin ouais in auro pu querre dans zeune embuscate montée par ché zapaches

pi in faijo attention i yauro pu y avoir des guetteurs camuchés et qui pourrotent donner l alerte ....

eune fo arrivés au ruissiau, in l' franchisso "allegremint" d un bond, en évitant d' marcher d' dins vu qui yavo grinmint d' mousse d' buée, et pas mal d' bouteles plastiques ...

chéto le dur retour à la réalité cha, faut dire qu ach' momint là, la porution in in parlo à peine, chéto pas cor un sujet d actualité ...