arondes, mouchons et saisons....
par minloute le, 26/03/2016tout d abord eune bonne nouvelle, cha devient rare inch' momint......
mais par ichi dans le sute ouest, ché arondes ale sont arvénues depuis l' début d' la semaine
j avo d'mindé am' "viele" voisine in face, qu am' disse quand qui serotent arvénues
j' dis "viele" mais meme si ale a plus d' 80 ans, ale pourro in arfaire vire à pas mal, ale arrete te pas dins sin gardin ....
comme ale dit, in sait pas commint qu ale font , mais as' trompent te pas, ni d' mason , ni de nids
faut dire qu ale a installé plus de 20 nids et in arrivant ale zont pu qu à aller querre des mousses, des tchiotes branques pour rimplir ché nids
ale s amusse meme à leur jeter des bouts d' coton hydrophile et is' précipitent d' sur pour rimbourrer leu masons...
cha y est l' printemps y est là .....
in avo djà eu ché passaches d' grues y a quinze jurs et là , ché arondes, i va pu manquer que ché martinets mais là faudra cor attinte un tchiot peu plus ..........
j'me faijo la reflexion que quand que j éto tchiot , à mason , in éto pas "ojio"
j' diro meme que j in avo pas un bon souv'nir, djà dins l' mason in avo un coupe d perruches .....
alors dés qu in avo quéqu un qui v' no al' mason et qui discuto avec mes parints, ché perruches as' melotent d' la conversation, in poussant des cris , qu in s intindo pu ....
sans compter qui éclaboussotent toudis un peu, sans parler des graines qui quéyottent à terre ........
mais bon un coup y en a eune qu ale s a involé, et l aute ale a pas supporté et ale du mourrir d' chagrin ....
pour in arvernir à ché zojios d' dehors, al' mason , j a pas l' souvenir qu in voyo des mésanches
nan , surtout des mouchons, et cor j ' les avo pas trop ker, vu que i n' avo grinmint qui avotent fait leu nids tout in haut del mason dins l' gouttiere, et que cha arrivo cor assez souvint d' artrouver des ojiaux morts, des tous jones, qui n avotent pas cor d' pleumes , qui étotent queu d' la gouttiere d in haut , tchiot cou décharné, tiete presque trop grosse pour ch' corps , et ché boyaux d' tout arsortis .....
ché mouchons m' mère ale leur donno à minger, mais uniqu'mint avec ché miettes qui yavo sul' toile cirée aprés minger
ale ouvro à peine l' porte, al' jeto cha dins l' cour, et i zarrivotent tout d' suite
autres ojios qu in voyo mais qui étotent pas "sympathiques" ché merles bin sur, sans oublier ché sansonnets qui étotent in rang su ché fils electriques d'vant l' mason ......
in donno pas autremint à minger, al' mason in faijo pas d' nichoirs, j a l impression d in avoir d abord vu , savez du ?
lors des émissions d' télévision scolaire qui yavo in début d après midi al' télévision , entre 14 et 15 h , et qu in suivo d' temps en temps quand que j éto in primaire à l école loubet ......
j' dijo in comminchant, cha y est ch'est l' printemps, j' me souviens d eune reflexion que j avo fait à min père , dijant que comme saison j' préféro l automne
l automne avec ses sinteurs, ses couleurs etc .... et min père i m avo dit , té verra in vieillissant , ché saisons té vas les avoir ker dins l' sens qui zarriffent ....
printemps d abord, été, automne et in tout dernier lieu l hiver ......
et j' cro qui avo raison en fin d' compte ....