retour vers le passé assuré 1

s'maine derniere, j' va à mon liderprice, et j'avo invie d' biere, mais bon pas del biere comme asteure....

ché bieres in canette , asteure in n' a plein d' sortes ....

ché bieres d' abbaye, toutes fondées en 1200 et des bricoles....que tout ché noms i finissent en "en" , qu in fait ale zont pas été en activité depuis un bon momint, mais que ché grands groupes i racatent rin que pour s' servir d' leu nom pour faire plus ancien .....

pourtant Leffe, Chimay, Orval tout cha ,cha tient pour mi plus qu' la route ..........

après zavez ché bieres pour alcoolique,( quand que j' dis cha j' critique pas ché gins là, vu que ch'est eune sacrée dépendance )

savez ché bieres in boites à ferale , à 8 degrés d alcool , à pas ker, qu in vo souvint hélas des gins qui passent in caisse au magasin, en in montrant eune al' caissiere tout en ouvrant l' sac plastique pour qu ale puisse compter ché bieres, sans que ché zautes gins i vo combien qui n' a ....

des bieres à fort degré en alcool, tout cha pour que la fete ale so plus folle ......

pas pour mi, in plus j' trouffe qu ale sont pas bonnes... et eune jenlain ch' est bin meilleux ....

y a aussi ché bieres dites exotiques, j' dis pas qui a pas d' bonnes bieres à l étranger, mais j' me d'minte si in acate pas certaines tout cha pour "faire bien" .....

j' parlero bin d' la biere "chti" , qui avo un rayon'mint vraimint local , mais que Saint Dany Boon y a en fait, grace à sin flime, un produit "tendance" tout comme ch' maroilles ....

pi mes gins, y a l' biere d' tape ........

alors sur que dinch' nord, in avo l habitute à tabe d' boire d' la biere que j'diro d' consommation courante...

la biere Bock , (j' passerai vite fait su la valstar) , mais aussi la biere Pelican ......

ch'est sur qu in a tous connu cha, meme que beaucoup d inter nouzautes, un jur d' la s'maine, ch' marchand d' boissons i passo, qui arpronno not' casier à bouteles in bo, avec ché bouteles vites, pour les rimplacher par un casier à bouteles avec ché bouteles pleines..

meme que cha faijo un sacré boucan, faut dire que pour faire toute l' tournée, fallo pas chomer ....

souvint y en avo un qui resto in haut du camion, souvint ch' chauffeur du camion , et l aute i faijo la navette avec ché casiers entre l' camion et l' mason ....

grinmint aussi ont connu la biere faite mason ...

mi j a connu cha, et à boire chte biere , chéto presque un jeu de stratégie

j' vous zexplique, l' meilleux dins l' boutele, chéto les premiers quarts ...

si in simplifio, plus t intamo l' boutele, moins chéto pétillant, et plus t arrivo vers ch' fond du que l' biere , cha r'semblo j allo dire à del vase....

in tout cas, ch'éto loin d ete aussi bon , am'mote un probleme d' levure .....

et quand que min père i servo l' biere, in s' dépécho d ete servi si y entamo l' boutele ...

et in s' batto pas, in rintro meme sin nez vers s' n assiette, quand qu in voyo qu in arrivo vers l' fond

qui ch'est qui in veut ?

min frère i dijo souvint " tel' donne à Untelle", s' soeur cadette, et i rajoutto toudis "ché bon pour ses boutons" .....

j en arviens à mon leader price, j' vo des tchiotes canettes, chéto marqué "HELBRAU biere des flandres"

j' do avouer que j l' a acaté pasque chéto marqué biere des flandres , pi que 4.2 en degré d alcool

j in a bu eune en mingeant, ja tiqué, et j' m a dit vindiousse, in diro eune biere comme qu in buvo quand qu in éto tchiot

j a été ravisé sur internet, en fait, HELBRAU, ch'est eune marque déposée des brasseries de saint omer

mi qui cacho après chte biere, in in trouvo avant à mon carrefour market, pi à mon mutant, et là miraque j' l artrouffe ......

alors ch'est sur, ch'est pas eune biere d' dégustation, ch'est vraimint eune biere pour accompagner ché repas .....

nouzautes in avo l habitute d' boire del biere à tous ché arpas , j' me souviens meme qu in éto en vagances en normandie, j avo 8 ans et j' me souviens d' gins qui étotent étonnés que j' buvo del biere déjà a'm n'age .........