histoires-de-chtis® depuis le 20 février 2005

 

 

Les 60 dernières histoires


  bientôt 3 ans ...... (26/03/2017)
  minloute au bordel (26/03/2017)
  faut ti in rire ou in braire (19/03/2017)
  Liévin, Cérémonie et commémoration du 16 Mars 1957 (17/03/2017)
  la p'tite clef du bonheur ... (09/03/2017)
  yoyo le deglingo (05/03/2017)
  Raymond KOPA (03/03/2017)
  Marinette (28/02/2017)
  j auro pas du aller rouvrir l' portal (26/02/2017)
  ch' mimosa (25/02/2017)
  mystère d' carte postale (22/02/2017)
  min grand onc' chauffeur d'ingénieur (21/02/2017)
  à vélo dins min quartier (20/02/2017)
  le drive 1 (19/02/2017)
  le drive (19/02/2017)
  cordonnier rue Anatole France (18/02/2017)
  le tapioca (17/02/2017)
  tem' rameneras du marché (15/02/2017)
  du rififi à l impasse Toupy fin (14/02/2017)
  du rififi à l impasse Toupy (13/02/2017)
  du pélican à la lessiveusse (12/02/2017)
  du créchon au bas nylon (11/02/2017)
  aut' moyens d' locomotion (10/02/2017)
  carettes d' la rue leverrier (09/02/2017)
  à l arriere de l ariane (08/02/2017)
  décés de monsieur Opigez (07/02/2017)
  si cha existe cor ... (04/02/2017)
  France 2 l'épopée des gueules noires (02/02/2017)
  cocorichti (30/01/2017)
  cuisine - du guinsse (30/01/2017)
  jacinthe (25/01/2017)
  sur les routes nationales fin (24/01/2017)
  su les routes nationales partie 2 (23/01/2017)
  décès de Mado Poquet (1) (22/01/2017)
  récitation fin (22/01/2017)
  su les routes nationales partie 1 (21/01/2017)
  décés de Mado Poquet (20/01/2017)
  récitation partie 2 (20/01/2017)
  récitation partie une (19/01/2017)
  tin gardin (18/01/2017)
  Magellan à cause d' ti (15/01/2017)
  à Monsieur Robitaillé (15/01/2017)
  la même histoire version 2 (12/01/2017)
  la même histoire version 1 (12/01/2017)
  ch' maite au traval partie 2 (10/01/2017)
  ch' maite au traval partie 1 (10/01/2017)
  Changement d'école (10/01/2017)
  Hiver d'antan (09/01/2017)
  Alfred Leroy (09/01/2017)
  ch' maite Robitaillé (08/01/2017)
  fautes d' français à l'Élysée (08/01/2017)
  au cimetière du 3 (06/01/2017)
  in pouvo pas laisser ch' Terminus comme cha (06/01/2017)
  avec du recul (04/01/2017)
  Bruay vu du 3 (04/01/2017)
  ch' café le Terminus (03/01/2017)
  histoire de la laiterie de Verton (02/01/2017)
  réveillon quand que j éto jone (31/12/2016)
  Cavalcades (27/12/2016)
  La rue Stephenson à Bruay (27/12/2016)

Vos histoires


Proposer un article

Livre d'or


Ecrire dans le livre d'or
Lire les messages du livre d'or

Derniers messages :


 mineur toujours ( 04/03/2017)
l'écomusée de Noyell...
 ch piou ( 20/01/2017)
Je vous écris ces qu...
 d. FREVILLE ( 05/01/2017)
je suis un ancien mi...
 Hervé62155 ( 22/12/2016)
Joyeux Noël et bonne...
 franed ( 16/12/2016)
Bonjour, site très i...


Liens
Histoires de chtis sur votre site
un tiroir à malices
par minloute le, 23/08/2016  

avant qui a ché fameuses "rénovations" dins ché corons, nous in a eu dro à cha fin des années 70, l'pieche qu in appello " l arriere cuisine" , mais qui en fait éto vraimint l indro du qu in faijo à minger , in pouvo la décrire ainsi :

un frigidaire, et quand que je dis "frigidaire" chéto s' marque, après yavo ch' fourneau, au d' sus du frigidaire et du fourneau yavo 2 étagères in vo qui courrotent tout le long dech' mur

en face yavo un viel évier blanc, devenu écru à la force des années, un tchiot meupe sul coté et pi chéto tout, ah nan , yavo cor au miyeu eune tchiote tape

eune tchiote tape in bo, savez , tape in bo, et d' sur comme un revet'mint comme plastifié, et pi sur tout l' pourtour del tape, un bord en fer blanc cloué par indrots

ch'éto l' tchiote tape à ma mère, celle du qu ale metto ché zingrédients quand qu ale préparo un r'pas

et yavo surtout such' coté, SIN tiroir, ch'éto vraimint l' tiroir de m 'mère, du qu ale metto d' dins , commint vous dire , tout in "équip'mint espécifique " qui pouvo li servir

j' va pas vous faire un inventaire à la Prévert, mais j' me souviens d un coup, qu ale avo décidé d' bin l' ringer, et qu ale l avo artiré del tape, posé sul' tape d' "la cuisine" ...

"cuisine " qui chez nouzautes éto l endrot du qu in passo à tape pour minger

ch' tiroir éto posé sul' tape, mi j éto assis d'vant m'mère ou plutôt j' m éto mis à croucou sul' tape, j' faijo cha pasque min père éto pas là, i avo vraimint pas ker cha, vu que j éto "un peu brizaque" et dans m' n élan, j auro pu querre à la renverse

rigolez pas, j in a fait des vertes et des pas mures quand que j éto tchiot et j' min su rindu vraimint compte quand que j a comparé "mes betisses " avec celles d' mes zéfants ..

on arvient al' tape, le tiroir étot posé d'vant m'mère, mi si j m éto acoute, j auro eu min nez d ' dins, m' mère ale me dijo d' m ardrecher, " d arprinte un mète" comme i dijotent mes parints

mais meme ardréché, d'vant mi éto étalé tout un trésor , tout plein d ustensiles qu in sorto pas souvint, ou d un usache comme j' dijo plutôt spécifique

j avo ker un pitit coutiau d' poche qui traino là, lame cassée , mais qui veno de Lourdes, à vire sul' manche la reproduction d' Bernadette in train d' prier devant la vierche Marie

pas loin, toutes arliées intr' elles avec un elastique, des toutes tchiotes fourchettes, avec des tchiots manches in plastique d' différentes couleurs que m'mère ale m avo dit que ch'éto des fourchettes à escargots

mi j' raviso cha d un drole d eule, djà que minger des zescargots quand qu in a pas 10 ans , ch'est pas quéquosse qui vous atire ...

yavo aussi eune boule d' thé, ale servo pas grinmint, m'mère ale in buvo pas, cha a pététe servi eune paire ed' coups pour mes sœurs, quo que j a plutôt l' souvenir qui faijotent trimper des sachets in papier

sans compter eune espéce de mini passoire, que am' mote cha devo servir pour l' meme effet

yavo aussi et là cha rigolo pas, yavo eune espèce d' sécateur, ouais ch'est à cha que cha arsemblo l' plus , parait que cha aido pour découper ché volailles

au bord , cor dins leur papier individuel, j allo dire "des pales", in appelle cha aussi des chalumeaux , asteure in in trouffe pu que collés sur ché mini packs d' jus d' fruit, ou alors pour ché "coquetales" alcoolisés ...

un couteau à huitres, oh j avo ker cha, j auro bin voulu juer avec, j' do avouer, asteure y a prescription, que eune paire d' coups j ' l avo "emprunté" pour aller juer avec mes camarates dans l' pature pas loin del mason, avec s' pitite lame et surtout s' protection qui arsemblo à celle d' l épée d' Zorro, j avo ker juer avec .....

vinguette, j auro du commincher par l essentiel, yavo au bord , eune paire d' ciseaux et del fichelle blanque toute fine, que m' mère ale utiliso quand qu ale voulo attacher ensempe ché porions quand qu ale faijo ch' bouillon, pour éviter qui s' délitent d' trop dins l iau ...

Sully, ch' ministre de Henri quate i dijo "labourache et paturache sont les deux mamelles de la France" ...

j auro pu dire " ch' pitit coutiau d office et ch' l économe , sont les deux armes principales d' la cuisiniere"

ch' tiroir là , i éto ouvert et freumé bin souvint rin que pour que m' mère as' serve d' ché 2 coutiaux là et cha ch'éto tous les jurs ...

yavo aussi "ch' baton d' maréchal" d'em mère, eune cuillère in bo, ustensile fidèle entre les fidèles, mais cha in in arparlera dans un aut' sujet mes gins ..

deux générations d' tire bouchons, "le classique " , un dont la poignée chéto un morciau d' branque d' vigne, et l aute, "un moderne" , c' qu in appello à l époque un "de gaulle"

chtilale j' l avo ker, in arplio ché branques in auro dit un avion d' chasse ou un vaisseau spatial, ou bin in pouvo i voir aussi, eune tiete, un corps , pi des bras qui s' levotent et qui déchindotent à leu guise

sans parler d une paire d' limonadiers publicitaires, j' me souviens cor d un "cinzano" et d un "vabé" , am' mote des cadeaux offerts par chez Guillaume, ch' marchand de vins et spiritueux qui yavo après l' boulangerie tenue par les sœurs Balavoine, rue Anatole France, Bruay les berdoules, 62 pas de calais ...

yavo aussi eune espèce d' coupe tomates, là j avo pas l'dro d min servir, del toucher, et tout juste si j pouvo poser les ziux d' sur, avec ché lames qui étotent en forme d' vagues, et qu in passo d' sus ché tomates, tomates qu in mainteno avec eune espèce d ' poignée rouche

dernier accessoire qui y avo, ch'éto un pitit hachoir à main, avec eune manivelle, que m' mère as' servo quand quand qu ale voulo hacher du persil au d' sur d' chez salates

sans oublier quequ' coutiaux dépareillés, deux tro bouchons qu in metto su ché bouteles d' vin entamés, et zaurez fait l' tour, avec mi, du contenu dech fameux tiroir à malices d' l arriere cuisine , d y a plus d' 40 ans asteure....





par MIMI62 le, 25/08/2016

MI AUSSI J AI INCOR MIN TIROIR A MALICES
IN Y TREUV TOUS CHES AFFAIRES CITEES PAR MINLOUTE - j'dos tenir cha de'm mère -
mais in plus ya d' zélastiques, un bout d' papier de verre, un allume gas, d'zaleumettes, del fichelle, un' pierre à aiguiser ches coutiaux, du chatterton, un'petite lampe ed poche, un pétit instrumint en bo avec un' roulette pour faire chés rubans d'tarte à gros bords, un presse-al, un tournevis plat d'un coté cruciforme ed l'aut, et j'pinse que j'én'ai oublié - mai c'mint que j'féro sins min tiroir !!!


 


Contact | ©2005 histoires-de-chtis®.com - Webmaster : Gold77 - CNIL : 1075910 - 21 visiteurs connectés - Qui est connecté ? |