pikina
par minloute le, 26/09/2016pikina, ch'éto l' nom d un apéritif qu in voyo souvint la publicité peinte sur ché pignons d' masons
ch'éto l époque du que chéto pas cor des panneaux publicitaires,du que d'sur in collo et decollo d' zaffiches en papier
cor heureux d ailleurs, cha nous permet d'cor vire sur ché cotés d' masons, des publicités d un aut' temps qu in pourro dire...
avec les années , ché couleurs sont grinmint passées, et souvint ch'est presque in filigrane qu in vo l' nom d' ché marques qui avotent et ch'est l' cas del dire, pignon sur rue ...
l' pikina, bin i faijo partie d' la société Picon
autant l' Picon i éto fait pour et' la base d un mélanche, le plus souvint Picon Biere, cor que min mononque Octaffe qui cracho pas su un Picon vin blanc .....quand qui voulo "canger" d sin rituel pastis dins ch' fond du verre, cuillere à absinte posée such' verre, chuque posé d' sur, et l io qui verso par dessus tout cha .....
autant , l' Pikina, ch'éto un mélanche d' vins , français, comme chéto précisé dans la publicité , mélanche d' vins pi d oranche et de quinquina ....
à la mason in buvo pas d' Pikina, yavo bin eune boutele d'Picon, mais comme in éto pas des carnassiers à l'boisson, à la fin, comme ale duro eune paire d années, à la fin cha tenno plus à eune liqueur qu aut' cosse ...
et pourtant "pikina" ch'éto eune expression que j intindo régulier'mint , ou tout au moins 2 fos dans l année , à l occasion d' la nouvelle année, pi 15 jurs après quand que chéto l 'niversaire à Mémé , m' grand mère maternelle
premier d' l' an et 8 à 15 jurs après , in faijo un grand repas à mon dem' tante, repas qui réunisso tout l' monte, j' devro dire pour réseumer toute la descendance d' Mémé, ché deux files et infants et p'tits zinfants ...
car ach' t occasion là, savez y a des rituels qu in cange pas, après l' repas des plus copieux, ché zhommes i zallotent juer à cartes dins l' pieche d à coté
alors chéto toudis des discussions des plus animées, min père fallo toudis qui commente ses plis à la fin d' chaque partie "min manillon s'gond", "min roi troisieme" etc etc
et in juant , j a oublié d' préciser que chéto à la manile à quate , yao d' zexpressions qu in intindo souvint, quand que j' dis intindo , j auro du dire " criés" , pisque y a meme des coups ché femmes qui étotent restées dins l' pieche principale ale dijotent sinan d' freumer leu quinquet , tout au moins d' "baisser ch' volume"
dins les fameuses expressions qu in intindo yavo le "bats atout" ....
cha j' vous l'dis pasque mi j l' a intindu j' sais pas combien d' coups mais " si tin partenaire d in face y a pris l atout, quand que ch'est ti qui do arlancer, t hésite pas té bats atout" ......
après chéto des répliques , du genre , i n a un qui demindo du carreau , y en a un aut' qui dijo in juant carreau , en abattant ch' carte "caroline" , si n 'na un qui demindo du pique, bin l aute i dijo "piquina"
ouais de pique in' n a......zavez vu mes gins comme eune expression ale peut vous arfaire vous souvenir d' momints d' plus en plus loitains, mais qu in savo djà à l époque , que ch'éto des bons momints ..
cor que ché zexpressions quand qu in juo à tape, cha duro pas longtimps vu qu' min père , quand qui juo i éto concentré, ouais i sifflo avec s' bouque mais sans faire d' son, voyez quo, et là quand que cha commincho à trop parler , i dijo toudis " la manile ch'est un ju du qu in parle pas, i vous zauro dit mononque Octaffe "
alors si mononque Octaffe i l avo dit, meme si yéto déjà pu dech' monde, in s' taiso quand meme ....