du solel en plein automne

y a pas si longtimps, allez , eune tchiote cinquantaine d années, meme moins, ché légueumes étotent "d' saison" comme in dit

ch' t a dire que la tomate, chéto quand qui yavo d' la tomate en France, i commincho à y avoir del tomate espagnole bin sur mais , tout comme ché quériches, ou d autes fruits, i zarivotent sur ché zétals eune quinzaine d' jurs avant les produits Français ...

et vu ch' prix pratiqué, in attindo l' bon momint pour les acater , pour in arvenir à ché tomates, in les trouvo pas dins ché magasins d' détails, un 16 novempe ....

ch'éto normal, in savo qui allo falloir attinte un bon momint pour in profiter

là chéto cor l' temps d' certaines pommes, et comme légueumes, in éto vraimint tourné vers tout c' qui pouvo servir à faire un pot au feu

mai ach' momint là, in avo dro à des fruits qui nous paraissotent exotiques à ch' momint là

des fruits qui nous faijotent un peu réver, sortir d' not' quotidien
dates et figues, souvint dans un emballache que cha nous dijo que cha avo été récolté en afrique du nord

mi j avo cor ker les figues séchées, pasque meme si au premier abord, cha paraisso pas attirant, vinguette que chéto bon

pour ché dates, j avoue que j' préféro raviser l' boite avec ses arabesques, que d' les minger, j éto vite dégouté

mais ch' vrai solel en plein automne, chéto la mandarine et la clémentine

mandarines et clémentines, j' vous vo cor arriver au fond d un des cabas d' Clara
Clara quand qu ale nous rendo visite, l' premiere chosse qu ale faijo eune fo intrée, ale s asséyo, ale in prenno chinq pour s arposer

pi après avoir fait un premier tour d horizon, sur sin taux d' tension, ses escarres ,ses soins, j en passe et des meilleures,(ouais après ale allo in parler dans l' détal avec m' mère )

ale prenno un d' ses sacs sur ses genoux , ale intiquo s' main à l intérieur et ale déverso sul' tape ché mandarines ou ché clémentines, un peu savez comme ché jueux au casino, minquo pu qu ale disse "faites vos jeux" ....

mi j avo ker in minger, savez quand que dehors y a du vint et del drache que m' mère ale avo dit à clara que ch'eto pas prudent d' venir comme cha , et que taleure i faudra qu ale attinte l' retour d' min père qui l arconduira as' mason

savez ces jurs du que l' io ale claque sur ché vitres, que m' mère ale in vo pu la fin d' l automne , du comminch' mint d' l hiver, qu in est bin al' mason , pas loin dech' fourneau ...

alors in l appréciot cor plus la mandarine ou la clémentine ...