réveillon quand que j éto jone
par minloute le, 31/12/2016bin là mes gins croyez pas que j' va m étaler ichi à vous raconter in détal c' qui s' passo au réveillon al' mason ...
d' abord pasque pour mi la magie de noel ale éto partie, fini l attente, fini la joie d ouvrir ché cadeaux, fini l' repas d' noel...
pi ché sœurs ale sont arparties, dans quequ'jurs, souvint meme l' surlend'main, ale zallotent artravailler alors ale zétotent parties
mi j avo in vue la rintrée, dernieres révisions quotidiennes ....et pi mes parints zétotent djà agés, et l' réveillon in l' passo al' mason
d'abord in attindo pas minuit pour minger, nan, allez in faijo un exploit, in mingeo vers 19h30 au lieu d' 18h45...
m'mère ale servo un "pitit apéritif" , pi après chéto souvint la meme chosse, bisque de homard , des vols au vent, eune pintade , quequ' pétotes, (qu' min père i djo qui n' avo tout juste, à quo m'mère ale répondu que l'lend'main midi, chéto repas à mon des' sœur, et que là in allo grinmint minger ...) eune salate, quequ'fromaches, ouais des fromaches qui cangeotent d' habitute, in commincho à vire arriver des fromaches aux fines zerpes, des coulomiers, in tout cas cha nous cangeo d' la mimolette et du camenbert ...
après un dessert, mais j' me souviens pas c'que ch' éto, mi j éto pas eune gueule à chuque, j' devo djà d'minder à partir del tape
in raviso la télé ensuite, pi in allo s' couquer vers 11 heures au plus tard
dehors in intindo rin, pas d' passaches, ch'éto bin calme
ch'éto qu in miyeu del nuit, vers tro quat' heures au matin, qu in commincho à intinte quequ' passaches d' carettes que cha klaxonno grinmint ....
au matin, j avo dro à min cadeau habituel, eune pochette d' finqueux, ah zinquietez pas, chéto tout du faux, eune pipe jaune et rouche in plastique, avec sin briquet in plastique aussi ...
pi des cigarettes en chocolat (pas terripe d ailleurs ch' chocolat) , eune fausse boite d' tabac pour la pipe et pi chéto tout
faut dire qu' min père i dijo toudis, pourquo ché gins i sont contints d' printe eune année en plus ? J'comprinds pas qui fasse la fete pour cha ...