ch' maite au traval partie 2

pour in arvenir au traval dech' maite
quand qui nous avo donné d' quo faire ....

bin li souvint i s avincho sur la préparation du cours d après

j' me souviens espécial'mint des lines d' majuscules qui nous préparo au tableau

alors yavo deux fachons del faire, ch' maite Robitaillé, li écrivo sur ch' tableau principal dos à nouzautes

ch' maite Sergent , li y faijo cha sur un tableau à roulettes qui avo ringé sul' coté, et qui déplacho

i écrivo au dos, et eune fos qui fallo aborder l' nouvelle leço, i faijo pivoter ch' tableau et in voyo enfin quo qui avo écrit

dans les deux cas , si ch' maite i éto d'dos, ou si ch' maite i écrivo derriere, in s amuso pas à ram'ner not' guiffe, vu comme j in a parlé sul' sujet précedent i devino toudis quand qu in faijo eune betisse ....

Monsieur Robitaillé et Monsieur Wacheux, mes zinstituteux de cours élémentaires , j avo ker les raviser faire des lines d' lettes au tableau

i sortotent souvint eune grande règue, i traçotent deux lignes et après i s'amusotent j' sais pas si ch'est l' terme , à marquer ché lettres à la craie

avec la belle écriture curviligne, à la craie mes gins à la craie .....

fallo les vire, commint qui s appliquotent à les tracés, pleins et déliés, in appuyant plus ichi, in peu moins là , et magiqu'mint les belles lettres ale zapparaissotent .....

fallo les vire ,les envolées des "L" , des "D" , des "R" , in auro dit qui dessinotent , plus qui zécrivotent ..

après in éto toudis surpris , d' certaines lettes en majuscules le "o" avec sin gros vinte et s'tiote virgule, le "F" qui fallo pas confonte, en majuscule, avec le "T" ....

j avo ker la courbure du "U", l'envolée du "S " ou ché montanes russes du "M" ou du "W"........

in voyo la main droite qui appuyo plus ou moins su la craie, et in resto quequ' fo baba à les vire écrire, qui nous rappelotent à l orde, gentimint, quand qui nous voyotent les raviser avec un tchiot peu d admiration

pi mes gins, la craie, rar'mint ale casso , rar'mint ale crisso

cha nous surpreno aussi ch'éto d' vire un adulte, ch' maite, écrire comme nous qu in devo faire , ché zéfants

in avo tous vu l écriture d' nos parints, et souvint chéto quand meme éloigné de la belle écriture curviligne qui nous enseigno

pour nous, cha donno cor plus d auréole ach' maite, pasque nouzautes, quand qu in devo arcopier sur nos cahiers les belles lettes qui avo tracé au tableau, chéto souvint loin d' ete aussi bio ...

li avec eune craie et nouzautes avec un porte plume, bin vinguette i éto fort ch' maite

cor pire mes gins , quand qui vous invoyo au tableau tracer ché lettes, eune fo que t arveno at' plache té trouvo tin tracé bin moins sur, bin moins précis, sans parler que cha balo souvint du coté que cha aller querre ...

voilà mes gins, un instant d' la vie scolaire qu in a tous connu, enfin tous ceusses qui sont partis d'l école primaire à la fin des années 60