Magellan à cause d' ti
par minloute le, 15/01/2017Magellan, à cause d' ti, j a du in faire des lines ....
à l école primaire, j éto tiete en l air, un peu poete, y a des matières du que j' excello, j'les appreno à peine, tel'mint j' les avo ker, comme l histoire géographie, et d autes du que j a toudis été à la traine, comme ché calculs ..
j a toudis eu du maux à m' concentrer comme cha, longtimps , durant ché zheures d' classe, sauf bin sur si chéto mes matières préférées , que là , j' voyo pas ché zheures passer ...
i m' fallo pas grand cosse poiur que j' " m évade" , suffijo qui a l' carte géographique du relief d' la France et m' vlà parti à comparer le massif central à eune espèce d' cœur, à lire l' nom pour mi magique , d' certains endroits...
signal de toussaine, cret de la neige, seuil du Lauraguais ...
mais chéto "dangereux" pasque si ch' maite i ravisse ché zéléffes et qui vo qui n a un, mi, qui raviso d' coté , ch' éto sur que j allo m' faire arpérer
mais mi y a aut' cosse qui m' faijo réver, oh chéto pas grand cosse, chéto la carte maritime qu in artrouvo sul' pache d' couverture des cahiers Magellan
mi cha m' subjuguo, ch'est l' terme , à vire un batiau, comme chti d' christophe colomb qui avo l aire d' déchinte à toute blinte la cote de l amérique du sute pour passer rapid'mint les dangers du cap horn
faut dire qui aito bin aidé, vu qui éto tiré par 3 monstres marins, et ceux là i m' épatotent
sans oublier que pour que ch' batiau i avinche cor plus vite, yavo un dieu qui soufflo de par dessus ché nuaches, dins ché voiles ......
mais pour l' vire cha, fallo juer fin, pasque tous ché cahiers à l école i zétotent ,i devotent et' arcouverts d un protège cahier
non pas qu in voulo forchémint qui so bin protègé, enfin si , mais chéto pas l' seul but...
pasque in voulo pas non pu qu in puisse vire c' qui éto écrit à l arriere, sul' derniere pache , pasque y en avo pas mal, qui avotent comme cha derriere, ché fameusses tapes d' multiplication
alors comme cha pouvo aider ... fallo qui sottent arcouvertes
mi j faijo discret'mint, j artiro l' devant du protège cahier, et j' j avo querre raviser chte dessin du batiau de Magellan
j éto emporté par les flots, j' filo à travers l atlantique vers mon destin, aidé en cha par ché "dragons des mers" .....
ah j avo ker raviser les vagues, les détails du drapeau qui éto situé su la gauche
j éto tel'mint emporté par cha, qui y a un momint j éto pu là, nan j' éto pu dans la classe de monsieur Sergent en cm1
j auro du m' méfier, en fait j' m in su aperçu trop tard, j a été d un coup surpris qui yavo un grand silence dans la salle de classe
j a levé l' tiete, juste à temps pour archevoir un morciau d' craies sul' front
i pouvo pas louper sin coup ch' maite, i éto à moins d' quate metes d' mi ....
bin sur j' a pas pu répéter d' quo qui veno d' parler juste avant
bin sur, j a pas pu camucher que j avo artirer ch' protège cahier
bin sur j a pris un sacré paquet d' lines à faire ....
les lines ,chéto djà pesant à faire, in plus ch' maite i voulo pas des lines trop bin faites , savez quand que vous arcopiez des lines verticales de "je" pi de "ne" pi "raviserai" pi "pu" pi "ch' cahier" etc etc
nan in plus , i voulo la signature des parints, bon pour obtenir l' signature , fallo d' justifier, alors quand que té devo expliquer à tes parints que t avo été surpris en train d' raviser la carte à Magellan...
cha énervo "un peu" min père .....
( 2 photos)