récitation partie une
par minloute le, 19/01/2017ch' est ch' matin, in classant des photos qu eune photo ale m a fait busier
l automne avec ses feules mortes, cha m a fait arpinser à ch' cahier d' récitations qu in avo en ce2
dins ch' cahier, chéto toudis la meme chosse, su la droite, yavo l' récitation
croyez pas que ch' maite y allo sortir l' policopieusse pour nous l' donner, nan, in devo djà l arcopier, i l avo écrite ach' tableau
attintion mes gins au recopiache, de pas vous tromper , d' faire des ratures, ou d'faire des fautes
in fait chéto cor plus risqué qu eune simpe dictée , fallo vraimint s appliquer
su la gauche, chéto not' pache , so ch'maite i faijo d eune pierre deux coups et i nous d'mindo d faire un dessin ...
cha li permetto d' nous noter un deuxieme coup
oh la la, mi l'dessin chéto pas min fort, j' me souviens du poeme de Paul Fort que chéto aussi eune canchon, le ptit ch'val dans le mauvais temps, qui avo bin du courache
j ' me souviens que j ' l avo dessiné du miu que j' pouvo, avec un éclair juste au d' sur
mais je me souviens que ch' maite en passant i m avo d'mindé c'que chéto, vous vous doutez bin que les zautes, i ricanotent douch'mint
bin un bidet ...
et ch'maite i répondo, ah bon mi j'croyo que chéto eune carette à tchien ...
hilarité générale bin sur et mi j' piquo un phare ....
dur dur, pour mi les récitations, j avo du mau mais vraimint du mau à les zartenir
j arvo m'mère qui m' faijo répéter répéter répéter, et à la fin ale m ardonno min cahier d un coup, et ale dijo "apprind"
ale préciso après, t arviens m' vire que quand que tel conno .....
j auro pu y dire, mais j' l a appris plus tard, comme diso Montaigne " savoir par cœur , n'est pas savoir" .......
nan , j ahanno, j' buto su ché maux, ravalo m' glotte, gigotto su plache, mais cha m aido pas plus à dérouler m' récitation ......
d ailleurs quand que j avo eune nouvelle récitation, savez quand que ch'maite i vous dit " apprenez jusqu ichi", et meme si chéto pour l' semaine après , j avo l' consigne d'em mère, dem dire tout d'suite quand qui yavo des récitations à apprinte
cha nous permetto , cha li permetto d' commincher à mel faire apprinte, et souvint miraque , l' fameux jour qui yavo récitation et qu in pouvo et' interrogé , meme si j avo la peur au vinte avant l' début du cours, si j éto interrogé , j arrivo am' débrouiller et d m in sortir avec les honneurs
mais que stress, quand que ch'maite i dijo " bon j' va in interroger sul' l' poésie" i n a qui la saffent bin ...
alors yavo deux catégories, ché fayots, ceux qui s allongeotent presque sul' tape, l' bras in l air, prets à dire "m'sieur m'sieur" , surs d eux , sur d avoir eune bonne note
et pi, j allo dire "les sous mariniers" comme mi, qui dès que l' cours d' récitation i commincho, i zavotent l' tiete qui raviso leu cahier , freumé bin seur, ou qui ravisotent ch' pupite
JAMAIS ARLEVER T TIETE MALHEUREUX, té risquo d'croiser l' regard dech' maite, et là si t'tiete ale i arvéno, t éto bon pour t' lever, armonter l allée, en sintant l' regard d' tes "camarates d' classe" , et t allo t' planter su l' estrate .....