du pélican à la lessiveusse
par minloute le, 12/02/2017in' n avo d autes qu in voyo passer dans la rue
samedi après midi, en fin d après midi vers chinq heures , yavo Francis qui passo avec sin camion, Francis chéto ch' chauffeur du camion d' livraison d' à mon Willaume, ch' marchand d' boissons d' la rue Anatole France
sur sin camion, yavo l' publicité en grand, de la biere Pélican .... i travaillo sec Francis, i éto avec un aut' mais ch'est li qui donno l' rythme ...
ch'éto qu un ballet incessant d' cageots in bos avec bouteles pleines qui n avo un qui ameno au bord du camion et l aute i faijo la navette avec ché masons, avec ché cageots remplis d' bouteles vites
comme in dijo à l époque , "cha saquo fort", vinguette, in intindo ché bouteles berloquer dins ché cageots, in intindo aussi ché cageots vites qui faijotent riper such' plateau du camion
Francis i connaisso ces clients, i d'mindo simplemint si chéto comme d habitute, mais yavo pas attindu pour arriver avec c' que té prenno normal'mint chaque semaine
et i porto en bandoullère, l' sacoche avec ché sous, à peine le temps d' régler l' facture et y éto djà arparti......
un aut' qui nous laisso un souvenir "impérissape" chéto ch' camion d' brin, savez ch' camion qui s'garo d' vant chez vouzautes , qui yavo ché toyos qui allotent d' ech' camion à vote ouatère, et que cha imbaumo la rue ...
j' me souviens particulier'mint d un viu camion militaire réformé, transformé en camion à brin, et que la société s appelo "au brin de muguet" ...
d ailleurs in trouvo toudis que cha sinto plus quand que chéto ché les zautes que quand que chéto as' mason.....
in qui attindo avec impatience, in tout cas ch'éto l' cas d' min père, pasque après yavo cor du traval , chéto ch' camion à carbon, savez ,ch' camion benne qui avo des compartimints
i avo carqué quat' ou chinq clients, et i faijo s' tournée dans un orte bin précis, pasque tout un chacun et chéto selon s' catégorie professionnelle, i avo du carbon plus au moins bon
et cha faijo toudis raler min père, qui dijo que ch' mineur chti qui s' démeno l' plus chéto li qui avo ch' carbon l' moins bon
d ailleurs y a des coups quand que min père i voyo que dins ch' camion, juste après li, chéto un aut' du qui yavo des morceaux d' raccourches, ou un carbon qui simblo plus bio, i d' mindo innochamint au chauffeur si i pouvo pas livrer ch' client suivant avec sin carbon à nouzautes et d' faire un échanche
j' me souviens qu' min père i ralo, quand que j' dis cha, ch 'est comme chi j' marquo rin, i ralo toudis, mais i ralo toudis quand que ch' camion i balo , i trouvo toudis qui yavo trop d' poussières ...
in va pas trop trainer ichi y a cor ch' carbon à rintrer asteure ...
un peu moins gai, ch'est quand qui yavo eune ambulance ou un camion d' pompiers qui rintro dins l' rue, m' mère ale allo vire souvint al' barriere du qui s éto arrété
faut dire que dins l' rue chéto pu que des zartraités, souvint yavo quequ' vigins qui étotent aussi sortis, sans mot dire
pas par eune curiosité malsaine, mais vraimint à s inquiéter d' savoir du qui yavo un probleme d' santé ...
plus graffe encore, mais là ch est un souvenir qui date de 1967 pour mi ch'éto quand que Monsieur Mehay ch' vigin d en face i éto décédé
eune crox avo été fixée sul' coté d' la mason, des grantes tentures noires encadrotent la porte principale
j' me souviens du corbillard qui éto rintré dans la rue, avec ses grands bidets surmontés d' pompons noirs
mi cha m' faijo peur, j éto monté à l étache pour vire tout discret'mint par l' dessus du rebord del tablette del' farniette ...
pi toutes ché carettes dans la rue, ché gins qui défilotent à mon del mason d in face ...
j éto plutôt opressé qu aut' cosse
dins ch' tite, j' parlo d' lessiveusse, nan pas que j' va vous zarparler del buée du lundi matin
nan, chéto que ché vieles lessiveusses, ale zavotent eune seconte vie quand qu ale comminchotent à bat' d' l aile
ch'éto eune vie d ailleurs assez courte, ale zétotent transformées in poubelle
ah ouais ,chéto pas facile d' métier d' éboueur à l époque , pas d' roulettes à ché poubelles, pas d' mécanismes pour baler l' poubelle dins l' benne arriere...
j éto cor au lit, dehors chéto cor la nuit, qu in intindo passer ch'camion d' poubelle
i s arreto d' vant l' mason, j intindo les pas précipités d' l éboueux , du bruit du vidache dinch' camion, pi parfo faut l' dire , l' lessiveusse ale éto arposée pas forchémint delicat'mint ....
y a des coups min père, pour canger, i ralo, i dijo qui devotent faire un concours à chti qui les linço l' plus loin possipe.... à vire commint qu ale éto toute cabossée après ...
djà que ch' fond i commincho à rouiller, cha allo pas forchémint prolonger s' durée d' vie cht' affaire là .....
voilà mes gins j'cro bin que j a fais l' tour de tout c'qui pouvo venir dans la rue leverrier et que cha faijo " d l animation" ...