min grand onc' chauffeur d'ingénieur

j a ker chte photo , d abord pour s' netteté, sans et' artouchée et pourtant ale date des années 20

j' l a ker pasque y a plein d' détails , tout d abord l' carette, vindiousse i zavotent des belles carettes ché ingénieurs d' la compagnie des mines d' Bruay

sul' photo ch'est mon grand onc' , l' père de chti qui est l' plus jone sul' photo d' la page d' garte du site

i avo passé ch' permis en 1913, et après la guerre , i avo réussi à passer chauffeur d ingénieur

ch'éto la planque , in tout cas rin à vire avec ceusses qui déchindotent au fond

i habito à un momint du coté d' la gare, vers la rue de Dakar, vous dire exactemint j' sais pu, mais chéto surnommé "le quartier des bas de soie"

pasque là ché femmes ale pouvottent s en acater , enfin chéto un moyen d' dire que là yavo des gins qui gagnotent plus que la moyenne .......

yavo comme cha d' zindrots à Bruay qui avotent des surnoms, la rue d' la poste par exempe, la rue Camille Chrétien si vous préférez

bin in l appelo le coron des préférés pasque "bizar'mint" ceusses qui travaillottent à la mairie, directemint ou indirectemint, bin i logeotent là tout près ...

sur chte photo à part la beauté del carette, in vo qui a del bourlique , ou si vous préférez, del berdoule au sol

ch'te photo ale a été prisse dans le haut de la Clarence

mon grand onqu' i v'no vire s' mère Marie , m' n arrière grand mère

et quand té vo l' photo teut' dit qui yavo un monde entre ché ingénieurs et ché mineurs ......

j' m' in éto aussi aperçu, si i fallo eune preuffe, vous m' direz rin qu à vire ché masons tel voyo l' différence ...

ch'est en arlisant le recensement de 1911 de bruay (cha s' trouffe en ligne dans les archives départementales du pdc ; bon courache pour les lire , rin que pour ce recensement là y a plus de 300 pages mais ch'est intéressant)...

j avo qué comme cha, sur une famile , li y éto ingénieur, yavo s' femme, 2 zinfants et j avo compté , entre ch' gardinier, ch' chauffeur , et ché femmes d' champe, ménagère, lingère, y zavotent pas moins de 6 employés

cha faijo quand même un sacré écart avec ché mineurs, ché pour cha , que quand que j intinds vanter le traval et l abnégation du mineur .... cha m' fait toudis tiquer, i n' a qui n' ont plus profité qu' eux, et de loin ...