le balto ou le marigny
par minloute le, 22/04/2017in a tous connu cha, ichi j appelle cha le Balto ou le Marigny, ch'éto des noms courants y a pas cor si longtimps qu' cha, et ch éto souvint donné à c'qu in appelo les bars tabac
bar tabac pmu ... y a pas si longtimps qu' cha j a été dans un bar tabac pmu, bin mes gins l ambiance ale a bin cangé
j' porte pas d' jug'mint pour savoir si chéto miu avant ou asteure , mais in vo que la société ale a bin cangé
quand té rintro dins ché cafés là "dins l' temps", t éto pris par l odeur d' finquée qui yavo à l intérieur, normal ché gins i fumotent à ché tapes ,(souv'nez vous d' ché cendriers jaunes à la gloire de Ricard) ......
dins l'temps té lé trouvo aussi su ché comptoirs, avant que y a eune loi qu ale les interdisse , cha a été l' début des restrictions , avant d in arriver asteure à la solution extreme ,que té peux pu finquer d'dins, que té sois au comptoir ou assis al' tape ...
avant té voyo ché gins assis à ché tapes, ch' journal à tiercé avec eusses
in étudio les cotes, in busio grinmint avec d' sortir l' pince et d' poinconner ché numéros qu in voulo juer avant d aller vire ch' buraliste
asteure té lé vo , les jueux, pu les memes, mais l' nouvelle génération, agglutinés autour del poste d' télé branché en permanence sul' chaine d' télé qui artransmet ché courses
té les vo faire des va et vient entre ch' poste et ch' buraliste, pour valider electroniqu'mint leurs misses, qui décitent jusqu au dernier momint
cha d' vient triste, j in discuto avec un "ancien" qui a pris s'retraite d un bar pmu y a chinq ans, et im' dijo que les zhabitutes des gins avotent cangées
yavo moins d' monte, et que ch éto moins convivial qu avant , qu' ché gins étotent plus rinfermés, moins respectueux qu avant
après ch est sur qu in a souvint l reflexe d' dire que chéto miu dans l' passé , pasque aussi la vie et les comportemints, nos comportemints, ont vraiment cangés ché dernieres décennies
la faute à qui ? mi j' pinse que plus qu in a developpé les moyens d' communication, bin paradoxal'mint ché gins sont plus rinfreumés sur eux memes
au d'là d' l habitute des jueux d' tiercé, d' l odeur quequ' fos intetante d' la finquée dins ché bars tabac, j'sais pas si vous zacatez cor des cigarettes, sinon allez raviser asteure ché étageres à cigarettes qui a derriere ché comptoirs ...
in y vo pu qu' du noir principal'mint, et d' grantes étiquettes que d'sur in nous dit que ch'est pas bon pour la santé d' finquer .....