ch'est pas pour les éfants

nan mes gins, le pied d' cochon ch'est pas pour les éfants

mi , tchiot, j in raffolo pas, faut dire que ch'éto pas un plat "imposé", nan , m' mère ale avo pas ker cha, alors min père i l acato que pour li meme

i l acato l' vendredi au marché d' bruay, et m' mère ale s in occupo en fin d après midi

pasque avant d' minger ou juste après ale pouvo pas, cha li donno des hauts l cœur, (comme quand qu in acato un lapin, ale pouvo pas raviser s' tiete, et quand que j' dis un lapin, ch est bin in lapin mort , dépioté , coupé, posé dins l' barquette, nan ale pouvo pas raviser s' tiete, pasque pour elle, il l a raviso avec sin eule vitreux)

meme cosse pour l' pied d' cochon, ale éto j allo dire pas rassurée, nan ale éto plutôt dégoutée del printe dins' main comme chi i allo cor bouger

faut dire aussi qu un pied d'cochon, ch'est "brut de pomme" , esthétiqu'mint ch'est pas c'qu in fait d' plus bio .....

d ailleurs , et escuse me Marcel, comme té l as pris in photo, meme mi cha m' diro pas grand cosse ...

nan ,m' mère comme jel dijo ale le préparo le vendredi en meme temps qu ale préparo le repas du soir

ale les metto dans un saladier avec vinaigrette persil et échalotte et direction ch' frigidaire

alors l' lend'main au soir, pour min pére chéto un repas de roi, sin pied d' cochon qui metto dans eune assiette creusse, et à coté i s' metto eune aut' assiette avec deux tro pétotes à l io

au delà de l aspect du pied d' cochon, y a aussi la fachon del minger qui pourro rebuter ché gins

si té sais pas , té sais pas par quel bout l' printe, faut y mette les dogts, t as rapid'mint del vinaigrette au coin del bouque ..

pi ch'pied, meme mort, i s ' laisse pas faire, faut presque s' batte avec pour li arracher un morciau d' viante par chi, un morceau d' gras par là, ou un bout d' tendon, tout cha arcouvert par eune pio bin épaisse , qui faut arracher avec dextérité avec un bon coutiau d' cuisine ..

faut et' patient, et pi avoir ker rogner, découper , sectionner et quequ' fo machouiller

m' mère ale dijo que cha arsemblo à du chinegome en texture, et qu ale comprenno pas qu in puisse y trouver plaiji à batailler comme cha pour récupérer quequ' fo un infime morciau d' viante ...

pour ché puristes del bonne tenue à tape, as' deminder si faudro pas faire comme pour ché zortolans, les minger avec eune serviette sul' tiete ...

j y a gouté un coup , et j a eu ker in minger aussi, si bien qu après min père i prenno 2 pieds d' cochon à mon del boucher such' marché