mais commint qui fait ?
par minloute le, 02/05/2017samedi au soir, pour nous, min père et mi, plattrée d' pates, des macaronis, cinq œufs frais au kilo , des Panzani
m' mère , elle , ch'est artichaut ...
ale in fait toudis cuire 3 au moins, comme cha dins l' pire des cas , ale in minche 2 et l' troisieme , ale le mingera frod , lundi au soir
j a dis , "dins l' pire des cas" , pasque ale chéto souvint la meme chosse
ale rameno d abord à tape , sur un dessous d' plat, d' sin coté , l' cocotte du qui yavo ché zartichauts
ensuite ale artourno dans l arriere cuisine querre ché pates, et là ale dijo avant d' servir, "y a quéqu un qui veut un artichaut avant ?"
mi j dijo ouais, et m' mère ale dijo toudis " avant tes pates ?" "bin ouais " que j' répondo
"mais commint qui fait" qu ale dijo m'mère, "du qui trouffe la plache pour met' tout cha ?"
m' mère ale utiliso eune espéce d orele in plastique , ouais , chéto comme un tchiot récipient qui v'no s accrocher sul' coté d' l assiette, et là in y verso l' vinaigrette pour pouvoir y tremper après ché feules d artichauts
mi j' préféro un tchiot ramequin, comme cha après , j' pouvo y baler ché morciaux du cœur que j allo découper
après bin après, j ' m attaquo à ché pates, avec un bon morciau d' paté acaté au marché la veile
pi eune bonne biere d' tape avec tout cha, pi un morciau d' fromache et un youyourt pour faire passer l' tout et j éto fin heureux ...
( 1 photos)