Merlimont hors saison 2
par minloute le, 14/05/2017vinguette, que plaiji j a a écrire cha, j' m arvo incrinqué entre ché deux sieches avant sul' lonque avenue qui ameno jusqu à la plache
savez au dernier tournant, chéto un peu comme ché coureurs cyclistes qui prennent ch' dernier virache et qui rintent dins ch' vélodrome quand qui font paris Roubaix ...
savez, l' clameur des gins, pi l adrénaline pour arriver premier su la line d arrivée ....
la r'montée d' la grante avenue, as' faijo pas sous les acclamations des spectateurs, mais interieur'mint oh que j éto contint ...........
su la droite ch' campine, pi des zarpes d' chaque coté, pas grand cosse d' construit, j' diro meme rin, jusqu à la fameusse grotte qui y a su la gauche, et cor un peu plus loin faut attinte pour arriver à ché premieres masons
chéto pas comme djà à la fin des années 80 que tout un quartier i s a developpé su la droite, jusqu à presque attinde garden plage ...
nan là, chéto le Merlimont d' mon enfance de la fin des années 60
vlà chi la route à droite pour tourner vers stella, pi ché grands batimints du qui yavo l' constructeur mr Pammard
(min père i passo toudis ichi avec un air dédaigneusse vu qui s' souveno et mi aussi vu que j éto pas né ach' momint là, mais que quand que ch' chalet y a fallu l' construire, i éto vénu et i dijo que chéto pas drot , et que cha allo querre aux premiers coups d' vint, sur qui éto pas contint d' vire qu in pouvo construire à coté d' chez li , des masons qui sochent te pas in parpaings)
l'batimint d' chez pammard i éto passé, alors là , savez mi, j' connaisso trop min père quand qui conduiso , alors commint vous dire ....
savez djà j allo dire, "fallo viser" pour trouver l' mason, ale éto in retrait, et chéto au dernier momint qu in arrivo d' vant qu in commincho à s' garer
asteure ch' est plus facile à trouver l entrée vu qu asteure y a la poste juste d' vant ....
mais bon j arviens à min père, j allo parler qui allo garer l' carette, nan mes gins, cha teno plus de "747 in péril" savez ché flimes catastrophe du que ché zavions i zétotent tous in difficulté mais que meme si à la fin i finissotent avec eune seule aile, la queue d' l avion in flammes.....
tout cha grace à la dextérité et à la concentration du pilote i zarrivotent enfin à atterrir sous les vivats des passagers
nous chéto presque parel, quand que j' voyo qu in arrivo , j' m armetto tout d' suite sur min sieche, vu qui fallo qu' min père , pilote intre tous ché pilotes, i puisse vire dins sin rétroviseur tout l' long qui yauro la phase d attérissache, euh d' garache del carette devant le tchiot portail
ouais i metto sin clignotant bin à l avinche, fallo pas que chti d' derriere i continue al' coller , pasque i ralo sec ...
durant toute chte phase d approche, m' mère ale dijo rin , ale savo que ch' éto un momint d eune extreme tension, et ale savo qui fallo pas troubler la maneuffe
j' vous vo sourire mes gins, mais quand que j' parle d avion, ch'est pas loin d' cha, pasque conduire eune Peugeot 403 break, yavo pas d' direction assistée, et min père i s'ro cor là, i diro " in plus j' a qu eune gampe"
ouais i avo eune gampe raite, alors pour vous dire , i avo un permis espécial qui pouvo rouler sur certaines routes et pas sur d autes, par exempe i pouvo pas emprunter ché zautoroutes vu qui avo un systeme bricolé sul' carette avec un cab d' frein fixé a la pédale d embrayache, arlié à eune manette qui avo été ajoutée sul' coté du volant, pour li permette d' passer ché vitesses
de ch' fait là, durant qui passo ché vitesses i bougeo l' manette à droite ,tout en tenant d' l aute main ch' volant et eune aut' manette
bon heureus'mint cha ch'est toudis bin passé
min père i s' garo duch'mint un peu avant, i s' garo pas d'vant l' mason directemint, vu que l' sol chéto du sape ,et i avo pas invie d' devoir mette des plaques in tole qui avo dins s'baraque et que cha permetto al' carette d' pas s ensabler .....
alors là , à l avant , j allo dire , dins l' coquepite, min père i soufflo un grand coup, ch' éto la fin du stress , ch' capitaine i éto tout contint, par conte m' mère, tout à l avant aussi ale dijo cor rin
ale savo qui yavo cor eune paire d épreuffes avant qu in puisse enfin rintrer dins l' chalet, épreuffes délicates qui pouvotent provoquer des énervemints, et qu on intinte des "MEEEERRRRTTTTE"
mais cha mes gins cha sera demain ...