au coin d' la rue de Périgueux et et de Grenoble

cha date d eune paire d années, déjà ..... un coup que j éto armonté à Bruay , in avo prévu avec André de Marles d' es' vire et d ' aller minger as' mason au soir


quand qui a vénu m' récupérer à Bruay , i m a dit qu in avo rendez vous avec quéqu un , du coté de Marles

au coin d' la rue de périgueux et de Grenoble, au pied dech' terril , par derrière la cité du rond point, André y a garé s' carette et in a rintré chez Henri

Henri i éto là, avec Huguette bin sur, fin bénache d' nous vire, bin bénache pour mi del rincontrer

ch'est sur que si teut' limito al' tiete qui faijo sul' photo du qui éto habillé in mineur , comme diro l aute , i pouvo impressionner ...

d' ailleurs pour pouvoir in placher eune, fallo printe sin ticket ,Henri éto commint qu in pourro dire , volubile , enfin dans l' bon sens du terme, té comprenno que chéto li qui dirigeo l' conversation .....

mais cor heureux que Huguette ale éto là, pour li artrouver un dossier par chi, eune photo par là ........

Henri ch' jur là i m avo dédicacé des livrets d' poésie, j allo préciser mais ch est pas la peine ,que j' les a toudis ....

ch' jur là i faijo caud, très caud, j' me souviens dins l' carette avant d arriver , André i m avo dit que l' grosse caleur , chéto pas bin pour Henri, mais aussi pour li, pasque pour li i avo les memes difficultés à respirer par ch' temps là

d ailleurs i m' avo dit ach' momint là qui compto arrêter d' travailler à 57 ans, i li resto cor tro quat' années à faire, et après i se s'ro mis en maladie qui m' dijo , pour vraimint in profiter ....

pas évident à intinte cha , piau coin d' la conversation, Henri i évoquo commint que j allo dire s' succession, pas celle dech' notaire, mais celle d' ses oeuves , d' continuer à veiller qui so pas "pillé"

ch' jur là Henri i avo raconté eune histoire, qui avo été su un marché un peu comme in trouffe au Mining, et là i éto quéu su quéqu un qui avo imprimé ses poèmes à li et qui avo fait eune tchiote décoration autour et qui vindo cha à ché gins
Henri i s éto approché , sans rin dire, i avo d' mindé des renseignemints, et l aute i éto qué dins l' piège, en disant que bin sur , l auteur, Henri Raimbaut, i le connaisso bin

l aute i avo été fort imbété quand que Henri i s éto présenté à li

un bon momint qu in avo passé, Henri i avo abordé bin d autes sujets, et j li avo d'mindé du que et quand que cha li éto arrivé d' commincher à écrire des poésies ...

tout au long d' la conversation , j' sinto que Henri et André i zétotent proches l un d' l aute, 2 complices , 2 personnes qui s apprécient , "apprécier" chéto vraimint l' mot

pi y a un momint Henri in a sinti qui fallo écourter, André i m a dit qui avo b'soin d' ses bouteles pour respirer

in a parti, i faijo bio , un solel , mes gins, pas un nuache, au pied dech' terril

jem' douto pas que si rapid'mint après, l un après l aute i serottent partis ....