l'essoreusse à linche
par minloute le, 03/11/2017mon diu mes gins et là j' m adresse à ché garnoules, qu ale zont ou qu as' souviennent del corvée que chéto l' buée dins ché corons ...
lessiveusses qu in rimplicho d io la vele, qu in metto à cauffer such' fourneau toute la nuit et qu au matin, commincho la corvée d' la buée
j' parle bin d' corvée, j a toudis l' souvenir des mains gercées dem' mère, qu as' plaigno jamais, mais que j' voyo qu ale passo l' crème et qu in voyo que cha li faijo un bien fou ....
l' buée cha prenno du temps, armuer, laver, brosser, arsortir ch' linche, l essorer, et l' faire séquir
séquir au miux quand qui faijo bio, dinch' gardin su ché fils à linche, installés sur des vieux rals d' mines récupérés et mis in plache par min père ....
ou au pire quand qui pleuvo ou qui faijo trop frod, ch' linche i éto séqui dans l' cuisine, su ché fils, que cha pindo qu in se s'ro cru à naples .....
un des premiers progrès cha a été l essoreusse électrique de marque calor bin sur
ale éto associée à la tchiote machine à laver du même fabricant
l essoreusse à linche, ch'éto magique à vire, asteure pour nous faire "réver" faut la nintindo machinchosse, avant fallo pas grand cosse pour nous faire busier
j'em souviens dem' mère qu ale metto ch' linche d' dins, qu ale metto un bac en plastique d' vant du qui yavo ch' bec deverseur, et après in route ...
j a marqué "in route", commint vous dire à ceusses qui l ont pas connu ......
ch éto un peu comme du rodéo, ouais pasque au départ ch' linche qui éto au fond du tambour i freino de par son poids l' départ dech' moteur, alors cha donno des zacoups, et m' mère ale tenno bin l' essoreusse
ouais pasque si té faijo pas attention et qu as' décalo d' quequ' centimetes , et que l io ale commincho , à s évacuer par ch' bec de d' vant , cha pouvo s artrouver such' carrelache
et meme quand qu ale fonctionno l' essoreusse , fallo bin l' tenir , ale avo tendance à bouger par l' force centrifuche
(vlà que j imploie des mots savants asteure)
j' vous dijo que cha arsemblo à du rodéo, j' diro aussi que par sa forme, et par l' bruit du moteur, cha r'semblo aussi à eune soucoupe volante..
moteur qui faijo du bruit, et que dire quand que m'mère ale l arreto, fallo un tchiot momint pour qu ale s arrete complet'mint, et cha faijo comme des zacoups aussi
mais chéto djà un sacré progrès , d' pouvoir faire séquir ch' linche tout d' suite, meme si i "faijo cru" comme in dijo par chez nous .....
d années en années, ale a rendu bin des services, à la fin , ale avo ch' couverque d ailleurs et m'mère ale faijo bin attintion quand qu ale la faijo fonctionner
pi un jour , m' mère ale s in a pu servi, alors vous dire pourquo, pouvoir vous dire quo qu ale avo acaté d aute pour rimplacher, savez quand qu in est un ado tout boutonneux, c' qui s' passe dins l' cuisine, à part pour minger cha m interesso pas ...
mais cette essoreusse , même quand qu ale auro du ete armisée pour bons et loyaux services, ale a continué s' vie un bon momint mais pour aute cosse
m' mère ale s in servo pour egoutter ché salates .....véridique
( 1 photos)