arrivée de la télé et demandez le programme
par minloute le, 13/11/2017l arrivée d' la télé al' mason, commint vous dire, ch'est un peu comme la visite au pont du Gard que parlo Marcel Pagnol dans la gloire de mon père
suffit qu on in vienne al' mason à parler des débuts d' la télévision , que dés qui sintent que j' pourro en narparler, j a dro à eune levée d' boucliers
nan .... pas cor ... m' file ale in est à l' raconter am' plache, sans in oublier un seul mot .......
bon j' va vous zin arparler, vite fait quand même , j' va prétexter que cha va m' servir d introduction à m' n histoire
au passache j' pourra armercier ché zinstituteux d' l école Loubet et plus tard ché profs d' francais au collèche, qui nous dijotent qui nous serinotent qui fallo respecter le plan
c'est à dire eune introduction , la composition et bin sur la conclusion ...
sur qui m' suffit à évoquer l' arrivée d' la télé, que j' m arvo rue Anatole France
j'do avoir 7 ou 8 ans, i fait nuit, in buque al' porte du miyeu, 2 messieux i sont là , vétus d eune blousse grise, qui zont du mau à passer , à tourner entre ché portes du salon et d' la pièche de devant
mi, j' m a artrouvé coinché du coté d' la pièche de devant
cha y est ch' poste y est arrivé
savez j' dis cha aux plus jones, l arrivée de la télé cha a a été quequosse d aussi révolutionnaire qu asteure internet
al' mason in in avo pas d' télé, mais j avo des copains à l école Loubet, j' me souviens d' Asselin et de Blondel qui habitotent rue Chatellerault qui z'in avotent eune à leu mason, et i parlotent le lendemain matin so en allant à l école ou lors d' la récréation , de c'qui zavotent vu à la télévision la veille
j' me souviens qu un coup, j' m éto artrouvé plutôt bebette, direz chéto pas l' premier coup ni l' dernier, mais bon, vla ti pas qui parlent intre eusses d' la canteusse Sheila
et i n a un qui dit "ah ale est jolie Sheila hein ?", mi j' me sins obligé d'dire ouais, mais rapid'mint j' m éloigne d' peur qui me d'minte des détals ......
arrivée d' la télévision al' mason, sur que ch'poste d' radio qui éto le média principal, i va rester, j' diro même qui va réussir à survive grâce au progrès d' la miniaturisation , et du develop' mint du transistor
mais i li faudra accepter d' pu et' asteure LE MEDIA principal
la télévision cha a aussi bouleversé nos habitutes, comme j' dijo au lendemain d eune diffusion , d un flime qu in avo pu vire, cha parlo que d' cha dins ché cours d' récréation
cha a bouleversé aussi aut' cosse, avant chte pièche ale s appelo la salle à manger , bin qu in i mingeo pas souvint, l' diminche j' cro bin , in tout cas dins ché grantes occasions
l' tape ale trono au miyeu et pi derrière conte ch' mur yavo un grand buffet
l'arrivée de la télé, du poste , cha a tout chamboulé, même si cha a pas été d un coup mais chéto ineluctape
installation de la télé, avec un nouvieu meupe, moderne, eune tape avec des tchiots pieds in fer, avec un plan arcouvert de formica imitation bois
i fallo eune nouvelle tape, pasque si l' télé ale éto posée sul' dessus à l angue d un mur
y a fallu mette sur eune tablette in d'sous, ch' transformateur
ouais mes gins in éto déjà pu au temps des mythes et des légendes, mais in éto cor en 110 volts et fallo un adaptateur un transformateur pour que cha puisse fonctionner
nous vlà chi dans la salle à manger, in a arpoussé pour l instant l' grande tape, et bin sur toutes ché plantes, pour que ché zouvriers i puissent te travailler tranquil'mint
j a marqué d' bouger toutes ché plantes, pasque al' mason, cha a toudis été la jungue
des caoutchouques par chi, des fougères par là, pour vous dire j a toudis connu m'mère au matin , faire s' tournée ou plutôt faire au moins 2 tournées avec sin arrosoir pour mette d' l io dins toutes ché plantes
mais arvenons à nouzautes, dans la salle à manger, min père qui s approcho "un peu" pour essayer d' comprinte c' qui faijotent
m'mère et mi en retrait, m' mère les bras croisés, mi toudis armuant et me faijant m' calmer par elle
un poste, un poste de marque Radiola, si j a bien l' souvenir j' sais pu sin nom mais in l avo acaté à un gars qui habito Hesdigneul et qui éto aussi réparateur
ch' poste éto posé, mais aprés chés branchemints, passer ché cables blancs ...
de derrière l appareil, in les faijotte passer par ch' trou qui avo été fait dins ch' plafond
de là chéto la grante inconnue, pi cha m' faijo drôle, savez, yavo un des gars qui éto resté in bas, et l aute , qui éto monté dins ché étaches, dins not' mason, et qui allo faire passer ché câbles à travers ch' plafond cor aud' sur, pour v'nir insuite l' brancher dinch' grenier à la fameuse antenne .....
alors là mes gins , cha allo et' le grand momint, l apothéosse, ché zouvriers is ' parlotent l un d in bas, l aute d in haut ...
pi cha a été comme à cap carnaval, savez in florite du qui faijotent partir ché fusées ...cha a été ch'momint fatidique
oh in a pas fait ch'décomptache, mais d' vire ch' gars brancher pour la première fo l'prisse et d alleumer le transfo du bas ch'éto pour mi un even'mint historique qu in raviso avec respect et grand espoir...
ch' progrès i rintro al' mason ...
Bonjour, voici une photo montrant le survolteur qu'il fallait à une certaine époque pour faire fonctionner la radio ou la télé, il y avait différents modèles bien sûr.
( 1 photos)