ch' baril multifonctions ...

in a raconté la corvée des buées, pi heureus'mint dès la fin des années 60, la machine à laver est arrivée dins ché foyers

cha faijo des grands cang'mints qui sont intervenus dans la vie quotidienne (frigidaire , cuisine in formica, télévision et salon ) et in pouvo parler de progrès ...

de progrès dans not' vie de tous les jours

la machine à laver, j' va pas vous in décrire l arrivée, autant la télévision cha a été eune révolution , j allo dire culturelle, ouais j' peux l' dire quand meme , et que cha a chamboulé les habitutes d' chacun ...

autant la machine à laver .... pour mi cha a rin cangé à ma vie de tous les jours

mais pour m' mère cha a été eune sacrée amélioration et aussi des cang'mints dans sa vie quotidienne

autant avant i fallo l' diminche au soir aller querre avec min père, l' lessiveusse qui éto ringée dans eune des barraques ...

l' rimplir d iau, l' mette à cauffer au coin du fourneau pour la nuit, et l'lendemain commincher la corvée d' la buée

avec l arrivée d' la machine à laver chéto bin moins long , chéto bin moins fatiguant, et aussi cha abimo plus les mains dem' mère, ale avo pu d' gercures après ...

le savon à paillettes a été remisé dins l' barraque, et à l' plache in a eu dro à la lessiffe en poude

j' dis lessiffe, cha teno cor assez du détergent, j' me souviens qui yavo des couleurs qu ale passotent , au grand désespoir dem' mère, quand qu ale raviso l io sale s' écouler par ch' bec en caoutchouc dans l évier

ah i n a eu des chosses qu ale zont rétréci , autant asteure té mets à peu près tout dins l' machine sans raviser à quelle température té do l' passer , autant à l époque fallo vraimint trier ch' linche et pas s' tromper d' programme

ah in n' a eu des maronnes qui ont perdu eune paire d' tailles, l'pire chéto pour ché pulovers tricotés par m' mère et que de pulovers cha deveno des boléros ....

sans compter qu in porto aussi des loques en tergal ou en nylon et que chéto fort sensipe à eune trop forte caleur ....

zallez dire que m'mère ale faijo que des bétisses, mais savez c'qui nous sempe aujourd hui évident, bin un jour , y a bin fallu faire des essais, quequ'fo malheureux, pour après pu les faire ...

cha s appelle l expérience mes gins ..

donc, un coup, ale avo mis un quaouai plein d' berdoules que j avo été l' trainer au bois d ohlain , bin quand qui a arsorti del machine, chéto commint l' décrire , eune boule d' plastique qu in pouvo pu l' défaire et li ardonner s' forme originale

des marques d' lessiffes i n avo djà grinmint

m' mère ale utiliso tide, j a su que cha existo cor au maroc asteure, et j a vu aussi dans des reportaches, chte marque ale existe cor en indonésie

après ale a utilisé persil, persil cha a été la marque que j' me souviens l 'plus qu ale utiliso

par conte al' mason, Bonux, meme si yavo un cadeau d' dins, et que j' pousso m'mère à in acater, chéto niet, ale avo essayé un coup et cha lavo moins bien qu ale dijo ...

pour mi j' me demindo si ale dijo pas cha pour m imbeter ...

un peu plus tard, j' me souviens qui a eu super croix , chéto meme super croix 73 le nom complet, y en avo en vente en bas del rue, à la coop qui éto située pas loin des quat' chemins

y a eu aussi x tra , gamma, skip , j in passe et des meilleures

pi des lessiffes espéciales, comme coral, pasque "coral garde blanc le nylon blanc"

et pour la main car i fallo quand meme pouvoir arprinte c'qui avo pas été complet'mint bin lavé, ou alors ale l utiliso en prévention par exempe pour ché cols d' quemiche, chéto la lessiffe paic main