ch' baril multifonctions 1
par minloute le, 14/11/2017à l époque , la lessiffe ale éto pas comme asteure , concentrée
nan, fallo in mette plus qu asteure dins ché machines
qui dit grante consommation, dit grand condition'mint, ch'est pour cha que la lessiffe eto vendue dans des barils en carton
enfin quand que j' dis carton, chéto fait avec plusieurs couches, pasque ch' baril i peso djà sin poids .....
c'qui est remarquape, ch'est que en dehors d' la fonction de contenir la lessiffe, ché barils ont eu souvint eune aut' fonction eune fois vite
eune fo ch' baril vite, min père i le récupéro,cha li servo pour i mette d' dins sin pitit bo qui coupo li meme ...dans sa barraque au bois
ouais al' mason in avo la barraque au bois , du qui entreposo tout ch'ptit bo coupé en buchettes , cha servo à ralleumer ou à faire bin ardémarrer ch' fournau au matin
mais cha li servo aussi à y mette ché p'tits zoutils de jardinache qui avo besoin pour aller faire sin champ au bout d' la rue leverrier
j'me souviens cor dech' baril accroché par un sandove dins l' brouette , à coté des zarrosoirs , du louchet et du groet, près à partir ......
cha chéto j allo dire du bricolache d' tertous, j' dis cha sans moquerie
mais voyez , ché fabricants de lessiffe i zont du avoir vent que ché gins utilisotent ché barils eune fo vite
autant min père i l utiliso pour ses "extérieurs" autant ché ménagères ale zutilizotent ché barils pour leur "intérieur"
ché barils vites, ché femmes ale les décorotent , et chéto transformé en porte parapuie, en coffres à juets, in corbele à papier , à boite pour ché pelottes d laine
alors et quand qu in i pinse i zont fait del publicité du ginre "acatez not' lessiffe en baril comme cha vous pourrez in faire aut' cosse après" .....
y a meme eu del' lessiffe en baril vendu avec un rouleau de vénilia pour l arcouvrir après
et Persil, l' lessiffe d' em mère, avo fait fort, i zavotent sortis des "éditions espéciales" que ch' baril i éto in fer, et djà décoré extérieur'mint
alors cha mes gins zavez tous connus cha, ché corbeles in papier en ferale que ch éto avant des barils d' poude.......
sur eune des photos que j a mis , j a arconnu l' baril qui yavo à la mason , ch' baril corbele à papier, à gauche sul' photo, un fond marron avec comme par dessus des especes d' marguerites .......
pi ché industriels, i zont comminché à busier, ch'est bin un baril, mais ch'est rond, et y a d'la plache d' perdue sur eune palette, in pourro , in devro in mette plus , in vinte plus dins ché grands magasins
alors i zont eu l idée d in faire des rectangulaires, mais fallo que cha so aussi accépté par ché ménagères qui avotent ker ché barils ronds
alors i zont fait del publicité vantant non pas l' produit mais quo qu in pouvo faire en arcyclache avec des barils in va dire rectangulaires ...
dins mes recherches d' photos, j a keu sur un viu souvenir mais un très bon souvenir
Persil i avo fait des barils qui arprésentotent des guerites de soldats napoléoniens , j a eu chti qui est présenté au miyeu, avec ch' soldat au garte a vous
quand que t acato ch' baril là, t ouvro ch' couverque et là éto arplié c'qui permetto d' faire ch' toit d' la guerite, un toit en carton ET aussi un jeu d' cinq cartes individuelles qui arpresentotent des soldats de l armée napoléonienne.........
et pour terminer j' parlero des cadeaux, y en avo pas que chez bonux, y en avo dans les zautes marques , alors j' me souviens que j'guetto la fin du baril d' lessiffe et l' momint que m'mère ale allo ouvrer l aute
mais chéto quequ' fos frustrant, pasque ch' cadeau mes gins i le mettotent pas forchémint in haut du baril ...
dins l' baril yavo eune pitite pelle en plastique , et avec j' cacho après ch' cadeau mais combien d' coups que j' m a fait ingueuler, m' manche d' pulover rimplie d' poude à lessiffe .....
cor plus frustrant , quand que tel' trouvo pas tout de suite et que t'mère ale dijo, "bin té cachera l' prochain coup" ...
asteure ch'est plus l' cas, y a moins d'magie, t' lessiffe ché so des berlingots, so du liquite
i reste bin des tout tchiots barils, vu qu asteure la lessiffe ale est concentrée mais j' me dijo , qui auro pas la meme magie si fallo i cacher asteure un cadeau d'dins
pour terminer, et j' dis cha sans arriere pensée, j' m a souvenu aussi d un nom de lessiffe qui choquo pas à l époque mais qu asteure i faudro meme pon pinser appeler eune lessiffe comme cha, chéto la lessiffe ala
la preuffe que , meme si on avinche dins les sieques, in est dans eune périote plus "intégriste" qui a eune cinquantaine d années
mais in va finir par eune note optimiste, in tout cas qui devro vous rappeler de viux souvenirs avec ché photos ci jointes
( 6 photos)