Stella Plage et retour
par minloute le, 07/12/2017d'habitute j'raconte d' façon prolixe des détails d' em n'infance ...
j' voudro pas ichi blesser ché gins qui ont été en vagances à Stella plage, mais j'trouvo pas chte station bin jolie ...
pour mi i pouvo pas y avoir plus bio que Merlimont ...
le touquet chéto les prout prout
Berck, chéto eune ville à la mer, et j dis cha entre guillemets vu que cha pourro et' mal interprété, mais à l époque , in plus que j avo pas 10 ans ,cha simblo cor un peu dérangeant d' vire des gins cloués dans des fauteules, voir des lits à roulettes le long de l esplanate ...
Etaples , n in parlons pas, chéto un port
et comme à l époque quand qu in éto en vagances à Merlimont in allo pas souvint plus loin pi pourquo aller s' baigner in dehors de chte belle station balnéaire ?
pour vous dire quand que j éto tchiot , j éto persuadé que "chéto pas la meme mer" quand qu in s' baigno à Stella ou à Merlimont ...
Stella plage, cha s appelo comme cha pasque chéto eune station dont les avenues partotent en étoile vers l intérieur des terres
faut avouer que dans les années 70, le front de mer de stella chéto pas top
yavo quequ' batimints su la droite, posés là sur le front de mer, mais sans charme
j a écrit "posés là" j auro pu mette "isolés là" ....
pasque Stella cha donno l impression d' pas et' fini, fallo armonter presque un désert d' habitations pour armonter en "centre ville"
in plus t avo eune sacrée cote à monter
j a essayé d' m arpérer sur google maps, d artrouver des zindrots du qu in passo pour traverser la ville et artrouver au bout la route qui parto sur la droite , la longue line droite qui nous meno à merlimont ...
j a vu qui a grinmint d chosses qui ont cangé, djà que j avo pas beaucoup de souvenirs , cha m a pas aidé à in artrouver
j' me souviens qui yavo des magasins d artiques de plage, mais j' trouvo cha bin moins bio que Merlimont
à un momint yavo sur la gauche comme eune plache, in tout cas, yavo un bar restaurant j' cro bin et juste avant un mini golf
aute et dernier souvenir, j' cro bin qu à un momint in tourno sur la droite, pour printe eune aut' route, que plus loin in allo artourner sur la gauche pour arjointe la route qui meno à merlimont, et pour mi j' arvo un cinéma sur la gauche
si si yavo un aut' souvenir, dins ché rues sur la droite, ché pitites rues, ch' bitume au sol i éto de couleur rouche
et j'su désolé ché tout c'que je me souviens ...
nous vla chi arrivés au coin d' la fameusse route interminape qui permetto de relier Stella à Merlimont
j' savo pas que chéto eune route très récente à la fin des années 60
le souvenir d eune route en bitume pas lisse, avec des graviers cor bin visipe, j' m in souviens bin j' l arssinto quand que j' y allo à vélo
j' a marqué eune route interminape, pasque pour mi , j' voyo pas l intéret d arvenir par là
que plaiji in pouvo avoir d arvenir par chte route, du qui yavo pas d' trottoir, du qui fallo s' garer par momints au passage des carettes
que j' pouvo pas partir devant , que j' devo rester à coté d' mes parints vu que chéto trop dangereux ...
in auro pu j' l auro tel'mint voulu, arvenir à Merlimont par ché dunes, d ailleurs j' ralo quand qu in arveno par la route, mais i m a fallu un bon momint , à m' remémorer tout cha pour m arsouvenir pourquo qu in décido d' passer par là ou par là
en fait m' mère ale demindo toudis à min père avant de partir, comme qui yavo eune gampe raite, si y éto mate in arveno par la route, sinon in arveno par les dunes
et j' me dis asteure, qui avo un sacré courache pour arvenir avec eune gampe raite par ché dunes, in plus à l époque yavo pas chte verrue du camping , ché dunes ale zétotent bin plus hautes qu asteure
croyez pas que j'les voyo plus hautes qu asteure, mais in s' faijo djà la réflexion aux débuts des années 80
fin des années 60, quand qu in faijo ch' tour par les dunes, qu in le faijo avec mon mononque , mamatante et mon cousin, vers la fin du parcours, in parto djà en éclaireurs, avec min cousin , pour monter ché dernières dunes pour vire enfin l' bout du haut du clocher d' Merlimont
10 ans après in voyo ch' clocher d' merlimont quand qu in arveno djà de stella
mais arvenons à chte route interminape, in arveno vers Merlimont, durant un tchiot momint , yavo cor les dernières villas de Stella de par et d autres
après on longeo un grand campine sur la droite, et un peu plus loin, comme si chéto un peu bagdad café, yavo un grand bar restaurant ou snack bar j' sais pu bien
un grand batimint le dernier avant un grand momint
de là, yavo pu d' masons sur la droite jusqu à Merlimont
au beau miyeu de chte périgrination yavo un ilot d habitations, ch'éto garden plage, la station balnéaire, ou plutôt le projet de station balnéaire qui avo été comminché, eune station entre Merlimont et Stella, mais qui ne s éto jamais beaucoup developpé
j' vous parle bin de l époque de la fin des années 60, asteure cha a complet'mint cangé, in a construit par ichi à tour de bras , mais à l époque chéto loin d ete le cas
aute repère qu in allo bintot vire, et qui marquo non pas la fin de not' périple, mais qu in s' rapprocho de Merlimont , chéto le fameux château d eau qui avo été construit pour garden plage
château d eau qui déjà à l époque avait une allure un peu famélique , au dessous du réservoir, les pans en béton s étaient détachés par endroit, laissant voir l escalier intérieur
un esquelette en béton face aux intempéries , mais j éto contint d arriver à sa hauteur cha voulo dire qui yavo pu grand cosse à faire, pisque de du qu ale habito ma matante, in l' voyo ch' fameux château d eau
cha y est , in tourno à droite, in rintro dans Merlimont , cor tout au bout, mais sur la droite j' voyo les coins des dunes du que j allo juer régulier'mint ...
cor queques metes et in voyo enfin l' mason de ma matante, cor un dernier effort et in éto de retour au chalet
pour min père en rintrant un grand verre d iau du robinet, pour m'mère et mi , in avo dro à la même chosse mais avec du sirop