au marché fin
par minloute le, 10/12/2017après ché deux grantes allées, yavo sul' coté des dunes , des commerces un peu plus épars
yavo la fameusse marchande d' pichons , qu ale imballo ses pichons dins du papier journal d' la voix du nord édition d' boulone
d ailleurs un coup , ale avo pris ses clients à partie in dijant, mi min pichon ch'est m' n' homme qui va l' péquer, in est d' boulone, ch est marqué d' sus, qu ale dijo en montrant les pages du journal ...
mais surtout yavo c'qu in pourro dire, des camelots .....
quand que j éto tchiot in in passo pas avec m' mère,mais plus tard quand que j a comminché à et' adolescent, in m a un peu laché la bride et j a pu aller au marché aussi tout seu
j allo bin sur raviser , raraviser ché coutiaux, meme que ch' vindeux, j éto pas l' seul, quand qu in traino un peu d' trop i nous d'mindo c' qu in voulo acater ,sinon in devo aller vire plus loin si i n y éto pas non plus.......
ch' est rin, pour m' consoler, j m arréto longu'mint au stand des liffes, jetter un eule voir deux sur ché couvertures d' garnoules dénudées ...
mais j y allo aussi pour vire ché camelots
j' m in approcho pas d' trop près, j avo l impression et ichi j' voudro pas choquer quéqu un que chéto s'profession mais j avo l impression que chéto pas bin clair d' la facon dont i vindotent leu produits, voir meme qu in auro pététe pu in qualifier certains "d' voleux"
j avo constaté que ché vindeux là i zavotent besoin d espace, qui avotent besoin d eune audience qui soit bin docile..
quo qui vindotent ?
j' m in souviens de trois, un qui vindo des ménagères, et plein d'artiques ménagers in inosque
un aute qui vindo des couvertures , des draps , du linge quoi
et un troisieme qui vindo des matelas
i zavotent des styles différents, ch' plus discret, chéto l' couple qui vindo des artiques ménagers, cha commincho toudis par eune tombola
i distribuo des tchiots bouts d' papier roulés, et miraque d' chez miraque, yavo un taux d' gagnants qui éto vraimint élevé
bon pour arpartir avec eut' bricole i fallo que t attinte qui fasse sin bonimint qui expose s' gamme , et i n a grinmint qui restotent , d abord pasque yavo un cadeau au bout, d autes pasque i zaurotent pas osés partir comme cha
chéto toudis des direct usine, des produits d eune qualité, que souvint cha avo été testé par la nasa (chéto la grante époque des apollo , d ' l arrivée sur la lune, donc chéto sine d' qualité)
ché prix pététe elevés, mais fallo vire la qualité, d un coup, pasque ché gins i li étotent sympathiques, i zétotent divisés par deux
et au bout du compte, combien qui sont arpartis en acatant quéquosse, qu au départ chéto pas si indispensape qu' cha ?????
un peu plus loin yavo ch' marchand d' matelas, parel testé au moins par la nasa, as' deminder à l acouter si ch vindeux i éto pas médecin du dos, i parlo à ché gins, commint vous dire, i avo la tiete d' l emploi
pret à braire, prèt à acouter tous les malheurs d' chez gins , d' leur artrosses et companie, du momint qui puisse après leur présenter ch' produit miraque , bon d un prix un peu plus élevé que la normale, mais fallo pas oublier que chéto un investiss'mint
li j' diro des trois ch' est li qui in vindo l' moins, faut dire té pars acater des porions au marché et t arviens avec un matelas, faut djà l' faire ...
le troisieme, ch'est chti qui éto l' plus à l écart, grand stand, de grands parasols , des avalanches d' linche d' mason, d' couvertures, normales ou cauffantes, d' draps, d aleses j in passe et des meilleux
ch' camelot là, i avo mis sin camion à l arriere, et i avo comme eune estrate d' monté, comme cha i faijo un véritape show, allant d' la gauche su la droite, en invectivant ché futurs clients
vla ti pas que j a pas décrit l' personnache, am'mote chéto un boulonnais, i avo l accent et bin sur l' patois , ah si vous croyiez qui allo parler francais, bin vous vous mettiez l' doigt dans l eule
in plus ch' patois cha rapproche ché gins, i tutoyo ché gins d emblée
pitit, bedonnant, capio genre tyrolien sus tiete aussi, eune moustache , cha s invente pas, à la hitler, et un micro ....
un micro qui l imbeto pas dins ses déplach'mints vu qui avo fabriqué un porte micro avec un cintre d' vet'mint
eune gamelle, mes gins, pi j vous dijo qui invectivo ché gins, i arrivo à les rameuter au pied des' n estrade, d' proposer toudis des offres formidapes
i donno un prix d' départ, mais li i déchindo pas, au moins pas au début , i rajoutto des produits sans bouger l' prix, et à la fin yavo toudis des gins pour l acater
malin qui éto , i prenno ché gins à témoin, s' moquant d untel, ou criant sur ché gins, alors tel sors tin billet d' 10 francs ...
ouais i ingueulo ché gins, i présento des offres assez élévées et l' coup après i faijo "un destockage" et j' me souviens qui yavo des gins qui voulotent l acater, et li i crio, mais levez les mains bon dieu, et té voyo ché mains levées avec ch' billet d' 10 francs en l air
mi im' troublo ch' gars là ,commint que ché gins i zacceptotent des' faire ingueuler comme cha, i avo eune gueule qui in éto pas maite , mais que vous dire , cha avo l air d' bien fonctionner ...
voilà in a fait ch' tour du marché de merlimont, fin des années 60 début des années 70, hier quoi ....