ch' pitit calendrier

j' l arvo ch pitit calendrier, savez ché pitits calendriers qu in avo en début d année, des calendriers publicitaires de petite taille , qu in pouvo mette dins sin portefeule ...

début du mois de décempe, m' mère ale m in donno toudis un, ale l arsorto d ' sin tiroir d' euch' buffet, calendrier qu ale avo mis d' coté bien à l avinche

faut dire que La Noel pour ché jones ch'est toudis magique, pététe cor plus quand qu in a juste eune dizaine d années ...

qu in cro pu bin sur que ché cadeaux i zont été amenés ichi par traineau et passés par la cheminée

(faut dire que chte version , du passache par la cheminée, cha m avo plutot laissé d ' lèque , vu que nous al' mason, l' conduit de cheminée i atterrisso directemint dins ch' fourneau, et que durant chte périote d hiver, i fonctionno à toute blinte , la journée et la nuit)

mais arvenons ach' pitit calendrier que m' mère ale m avo donné juste au tout début du mo d' décempe ...

j' m in souviens bin d un, j l' avo mis bin en évidence sul' tableau de la cheminée en marbe qui yavo dins l' champe (l' cheminée par elle meme ale avo été arbouchée bin avant que j' so né)

sul' couverture, chéto l' photo d eune carette ancienne, intourée par un liseré jaune du plus bel effet

j a oublié d' vous dire que l' carette ch éto eune Renault type BK , avec ses phares qu in auro dit qu in avo piqué ché phares des calèches du sièque d avant

zallez dire minloute que mémoire, des' souvenir du modèle d' carette, mais voyez j a pas d mérite, vu que chte carte, durant l' mois d' décempe, ale resto pas souvint sul' tableau d' la cheminée

chaque jour j' prenno ch' calendrier et j' barro ché jurs, cor un d' passé, que plaiji d' vire qu in arrivo à la fin d' eune semaine, cha voulo dire qu in s' rapprocho d' la date d' noel

in s' rapprocho mais chéto jamais assez vite, alors j' arprenno l' carte dins mes mains, et j arconto l' nompe d' jurs qui restotent

que vous dire du soir du 24 décempe quand que j su allé m' couquer ?

j avo accepté les argumints d' mes parints, mi j auro bin voulu rester plus tard "en bas" vu qui yavo mes soeurs qui habitotent pu al' mason , qu ale zétotent arvenues

nan, minloute, faut aller t' couquer, cha sert à rin de veiller (faut dire que nouzautes in faijo pas de repas espécial le 24 au soir et que ché cadeaux chéto distribué le 25 au matin)

fallo que j' so en forme pour l' lendemain, eune journée forte en émotions

j' dijo pas grand cosse, chéto pas la peine d' ramener s' gamelle juste la veile d' la noel, cha sero pas prudent ...

donc j allo m' couquer, bin sur plus énervé que d habitute, que j' prenno min calendrier avec mi dins min lit, i avo terminé sin traval

fini, pu d' jurs à barrer, pu d' jurs à compter, yavo pu qu à s indormir et attinte , demain ce sera un autre jour ...