la plus pitite mason des houillères
par minloute le, 24/02/2018vous assurez que ch'est la plus pitite mason des houillères, j s' sais pas, mais tout du moins chéto pas la plus grante
in est à Bruay , rue Florent Evrard, in a passé ch' pont du 2 et on déchint vers la Lawe
ch' te mason , j ' l a bin connu, oh pas comme asteure qu ale a été arfaite, et même agrandie , pasque ché gins qui l ont acatée, i zont construit l' maison par dessus l existante
ch'éto l' mason al' cousine à min père
in i rintro par l' devant du qu ale est l' première farniete de la façade ..
je devro dire qu in y monto, fallo monter 3 grantes marches , en pierre bleue , là té buquo al' porte, et t avo pas trop tes aises pour attinte, souvint in ardéchindo such' trottoir de devant , le temps que Clara ale ouve l' porte
paradoxal'mint, eune fo que t avo monté ché marches et que t éto rintré à l intérieur, chéto très bas de plafond, am' mote dins les 2 metes
eune tchiote pièche, qu in pourro désigner comme l' pièche d' devant , murs et plafonds lambrissés et peints de couleur blanche
eune tape 6 cayelles, qui servotent pu à rin depuis bin longtimps , pisque Clara ale éto veuffe depuis l' miyeu des années 50
sul' coté, y avo un tchiot passache dérobé qui permetto de monter à l étage par un escalier des plus étroit
dans chte pièche , yavo l' fauteuil à Clara, ale s y metto souvint , pasque chéto l' seul endroit qui bénéficio vraimint de la lumière du jour ...
pi , d'là ale voyo qui veno buquer as' porte, ou vire passer ché gins ..
dans chte meme pièche, yavo ch' grand buffet bas, là chéto la caverne d ali baba
faut dire que Clara ale éto (trop) généreusse, ale savo pas arriver ché quéqu un sans apporter quéquosse
des fruits, du jus d' raisin, mais aussi des cigarettes, des chocolats, j in passe et des meilleures
un coup que j a été chez elle , ale avo ouvert ch' tiroir d in bas, mon diu, ale auro pu dépanner ché buralistes , ale avo bin eune dizaine d' cartouches d' cigarettes ......
de chte pièche qu in a vite fait l' tour, et que d ailleurs in i faijo que passer, in arrivo dans l'seconte et seule pièche du rez de chaussée, la cuisine salle à manger salon comme diro l aute .....
pas grinmint d' leumière qui veno de l extérieur, ch éto pas ouvert comme cha su la gauche, yavo un grand muret qui permetto au soleil d' passer mais que quequ'zheures, sinon yavo toudis la leumiere d allumée
chéto eune pieche un peu plus grante en surface, mais ale avo un très grand fourneau , bas égal'mint , qui prenno tout un grand angle
pour t assire, té devo t incrinquer entre eune banquette et eune tape, et eune fo assis, té bougeo pu
su ta droite , y avo un buffet bas , du que s'sur yavo les photos d' communiants, d' mariaches, d' militaires de toute s' famille , neveux et nièces ...
sul' coté entre ché deux pièches, un tout pitit bénitier ramené de Lourdes, sans compter les zarprésentations de Bernadette Soubirous devant la grotte, sainte Thérèse de Lisieux avec s' n' air d' constipée, enfin ch' est que m' n avis ...
sans compter crucifix, j' sais pas commint qu in met crucifix au pluriel , vu qui n avait plusieurs , souvint accompagné de chapelets intortillés autour de la croix
su la gauche , eune tchiote tablette, du que d' sur, in pouvo deviner que chéto les photos qui li tenotent l' plus à coeur ......
sin mari Marcel, et aussi sin demi frère , en tenue de tankiste, avec , et cha m avo impressionné étant tchiot, avec su sin béret , comme insigne, l' symbole des pirates, savez la tête de mort et ché oches croisés ......
in éto confiné dans chte pièche , mais in s y sinto bin, chéto vraimint l' pièche à vivre
souvint t éto surpris d un coup, pasque t avo 1 voir plusieurs cats qui venotent monter su l appui d'el farniete juste à coté d' ti, et qui miaulotent pour avoir à minger
j' vous a dit que Clara ale éto généreusse, mais aussi avec ché cats, ale in nourrisso bin eune dizaine, tous cor mi sauvaches, et qui la connaissotent surtout pour la gamelle ..........
là dins chte tchiote cour, asteure ouverte , du qui ya ch' portail in bo , ch est là qu ale avo ses remises...
cha servo de dortoirs à ché cats, et accessoir'mint ch'est là qu ale metto eune partie d'ses denrées, comme ché conserffes, ou ché bouteles d' jus d' fruit , qu ale avo in doupe que dis je AU MOINS en triple , fallo pas qu ale so en manque si quéqu un veno al' mason, parel avec ché boutelles d apéritifs.....
de chte tchiote courée , yavo un escalier, en briques, qui devo pas dater d hier, arcouvert par endrots de mauvaises herpes, et qui meno ach' gardin, qui li éto , au d'sus del mason, du qu in vo sul' photo qui zont mis un paillache
Clara cha faijo un momint qu ale y allo pu , yavo quéqu un qui li faijo sin gardin, ou plutôt qui , avec l accord de Clara y cultivo ses légueumes et il y en donno eune partie
toute tchiote mason, j' m arvo incrinqué dins l' banquette, à boire mon PAM PAM ananas......
le temps a passé, Clara ale a du s'résoude à quitter s' mason, pour intrer en maison de retraite
mais de ch' momint là , de plus pouvoir vadrouiller dins bruay avec ses cabas , de pu avoir s' mason, ale a comminché à s innuyer, et savez quand que cha comminche comme cha, après , bin ch est beaucoup moins gai...
( 1 photos)