le boulodrome
par minloute le, 06/03/2018In a vite fait d' faire des photos « collector » comme on dit asteure ,,,,,,,,
là cha date de 2008, j'l a longtimps connu ch' boulodrome là ,,,,
i éto situé in haut d' la cote des grands bureaux, ente la cité des électriciens et la pharmacie Bonnier
j'l a longtimps connu, j' y passo d'vant tous les jurs quand que j allo au lycée carnot ,,,
j' vous plante ch' décor, ch' boulodrome, pi surtout ché zartraités qui i étotent
j a pas marqué « qui y juotent », pasque yavo bin seur ceusses qui faijotent la partie, ceusses qui attindottent leu tour pour juer , d autes qui étotent là en simples spectateurs à bin raviser l' partie, d' autes qui étotent plutot du coté del buvette, à babeller intre eux , ou à commenter , de loin, ché exploits ou les loupés des zuns et des zautes
t avo l impression que le temps s y éto pététe pas arrêté, mais qui allo al' vitesse des boules que ché zartraités i faijotent rouler ,,,,,
ch'éto pas des boules d' pétanque, nan , des boules in bo,,,,
l' principe chéto pas « d'tirer » , mais de pointer, d' s approcher le plus près possipe du cochonnet, (un gros cochonnet d ailleurs)
cha d'mindo d'la réflexion, du temps,,, ch' est c' qui allo bin à ché « viux » jueurs
ch'éto pas l' tout d' juer, après ché coups étotent commentés, et que dire quand qui sortotent ch' mete pour mesurer ,,,,,,
tout y éto fait pour ché zanciens i so pas trop mates, yavo sul' coté eune gouttiere, du que ché joueux i pouvottent faire rouler ché boules , eune fos qui les zavottent ramassées ,,,
des bancs su ché cotés, pi devant l' piste du qui juotent, sans compter ché cayelles qui zavotent arsorti du cabanon in dur qui yavo sul' coté
ché là qui yavo l' fameusse buvette, queques cayelles, eune tape au cas zou qui zorodotent s' mette à l abri entre 2 drachées
des viux, j' dis cha sans moquerie, tous avec l' casquette vissée sul' tiete, grinmint avec l' cigarette roulée coinchée sul' coté del bouque ,,,,,,,,,,,,,,,
beaucoup aussi à l allure un peu chaloupée, signe d' fatique , signe que ché zans i les sintotent su leurs équalettes ,,,
chéto un boulodrome d' quartier, d' proximité, grinmint i venotent d' la cité des électriciens juste à coté ,,,,,,,,,,,,,,,,,,,
chéto aussi et certain'mint surtout un lieu de renconte, l' moyen pour grinmint d' occuper leurs aprés midis, tout en babellant intr'hommes ,,,
intr' hommes, mes gins, pas d' garnoules ichi ,,,,,,,,,
beaucoup de bonne humeur , d' moqueries , d applaudis'mints parfo, quand qui n avo un qui loupo ou qui réussisso un coup formidape ,,,,,,,,,
intr' hommes, pas d' garnoules ichi, tranquiles comme batisse, à boire s' canette ou à rouler s' cigarette tranquil'mint
yavo aussi des spectateurs qui ravisotent ché parties, au tout au moins durant un momint, carqués qui zétotent par leurs garnoules à prom'ner ch'quien ,,,,,
d'ailleurs, cha arrivo qui s' faijotent interpeller par ché jueux, « allez viens chi, rinte », et l aute qui dijo « non », et qui parto assez rapid'mint , et les zautes qui souriotent d' coin après , du genre « ch'est pas li qui porte l' maronne as' mason » ,,,,,
( 1 photos)