ém' première télé in couleurs

LA TELE COULEUR
mi, l’première fo qu’j’ai vu la télé in couleurs, ch’éto à Berck, dins les années 67 ; dins chtemps là, j’allo deux fo in vacances à berck, j’avos d’la chance : d’abord j’y allos le mois d’août avec mes parints pi mes frères ; enfin, mes parints, ch’étot surtout m’mère car min père y n’avot que deux semaines éd vacances ; alors y féjot des allers retours les samedi dimanches avec chés biaux autobus Dumont (qui avotent des rideaux à chez fenêtes, des appuie-têtes avec des serviettes blanches et pis des cendriers ). Quand in allot l’quèr à la gare le samedi à midi ch’étôt la fête, y avot toudis du soleil ; m’mère al m’téno par la main such trottoir del gare routière et in ravisot chés autobus arriver ; cha sintôt l’essence ; y’avot plein d’monde avec des valises. A chaque fo qu’in veyot arriver un autobus au loin, in espérot qu ch’étot ch’ti qui v’not d’bruay.

In louot eun pétite location pas loin d’l’église, dins la rue Mousel. Mais j’raconterai tout cha plus tard.

Donc j’allos deux fos à berck ; avec mes parints donc au mois d’aout ; in arvénot à bruay et in septembre, j’arparto à berck avec em grand-mère qui habitot avec nous. In y allot pour 3 semaines j’cros parce que l’rintrée, à ch’t’époque là, ch’étot in octobre…

In louot eune pétite baraque, un cagibi, din l’rue Louis Leroy, pas loin du Palais des sports et du château d’eau. La villa Fatima cha s’appello. Chés propriétaires y z’habitotent dins l’grande maison, chétot des personnes agées sans éfants. Et des fos, l’diminche soir, avec airs éd’conspirateurs, y m’invitotent à v’nir vir éch film sur leur télévision couleur. Alors le soir dit, j’arrivos à l’heure et y m’attindotes pour allumer ch’poste ; j’masseyos sur eun cayelle, y m’apportotes un verre éd limonade et y savourotes à m’plache l’plaisir qu’y z’allotent em’faire !

A ch’t’époque là, ch’étot l’tout début d’chés télé in couleur ; y n’avot nulle part ; minme pas à l’vitrine d’chez Chalmain. Mais ils l’allumotent pas tout d’suite, leur merveille ! Parce que la couleur, ch’étot un genre ed feull plastique colorée in 3 parties, le haut in bleu, ch’milieu in marron et ch’bas in vert ! Alors ch’étot bien pour raviser un film genre western mais pas chés informations !...

Alors mi, ch’a m’féjot rigoler parce qu’eux y étotes persuadés vraimint d’avoir eune télé in couleur !