ceci est mon testament
par minloute le, 02/12/2018sérieux mes gins, j' rigole pas avec cha, ceci est mon testament ...
y a un momint que j a décidé d' finir en cendres, pas invie d' et' mingé dins l' sol
y a un momint j' m éto décidé à les vire , cor que ch'est qu eune expression, j' m éto décidé à les vire dispersées face à ché montanes par chi
mais en fin d' compte cha m allo pas, nan in fait cha collo pas avec mi
alors j' va d'minder à mes zinfants d' armonter mes cendres à bruay , bon cha devro pas trop leur couter vu qu in pourro toudis coincher m' n 'urne dins ch' coffre, près del roue d' secours .......
par conte ,in arrivant à Arras, faudra sortir d' l autoroute, pi passer par la départementale d 937, passer d'vant la targette
pi s arreter au cimetiere du cabaret rouge quequ' zinstants, j'espère qui fera bio et qu in verra Notre Dame de Lorette
après in passera par Aix Noulette, Barlin, les quat' chemins , la rue Anatole France....
ch'est dins ch te rue que j a vécu bin d' zannées
déchinte d' la rue raymond deruy , m' rue préférée , passer ch' pont , devant la maison de Clara
d' là in va passer la Lawe , pi montée au 3
ch'est là que j' veux finir, au 3 , en surplomb de la ville, mais dominé par le fameux terril , presque collé au cimetiere
véritable sentinelle symbolique, véritable gardien d' tous ché mineurs interrés là .......
certain'mint dans l' caveau d'mes grands parints , in a eune belle vue savez d' là ...
artourner sus' terre natale ,ch'est bien , mais j' y s'ra pas seul mes gins
là j' va trouver mes grands parints que j a jamais connu, pi Clara qu ale est interrée pas loin....
j' traverse quequ'travées , et j ' pourra aller discuter avec Daniel Poquet ...
j' arviens sur mes pas, y André qui est installé royal'mint face ach' terril, en classe vip, si in peut dire ....
pi pas loin d' l entrée, y a l' tompe à Fortuné et Marie, Fortuné in n' a as' dire ,ou plutot j' n a cor à t acouter , ti qui parlo que patois et qui l' magno magistral'mint .....
pi savez j ' pourra pas m ennuyer, j auro cor à artrouver du qui est interré Jacques Janquin, et avec ti aussi, j aura grinmint à dire .............
in ira in haut dech' terril raviser la campane presque tout partout autour d' nous, in est chi presque au bout du bassin..
au loin in ravisera l antenne d' bouvigny sur sa longue échine boisée qui finira à Notre Dame de Lorette
pi in f'ra comme ché viux comme i faijotent dans l' temps, qui sortotent au soir ché cayelles pour discuter jusqu à temps que l' nuit al' tompe ..
après, le temps y passera, ché zinfants eux aussi i vieilliront, mais j' su sur que meme loin d ichi, i zarviendront au moins un coup avec leurs zinfants pour qui vo c' que chéto l' bassin minier .....
min grand père qui habitot rue de L'observatoire l' rue in face du cimetière (le caveau d'attente comme disotent les vieux) disot toudis:
Quand ej mourrirais té mettra min cercueil tout in haut du terri et te le f'ras glicher jusqu'à dins l'trou.
Malheureusemint ses dernières volontés n'ont pas pu ete respectées.
intre temps l' rue à été rasée y a été obligé d'aller habiter rue de Bône.
y avot quand même un sacré humour noir pépère Arthur..
( 1 photos)