les chaussons aux pommes
par minloute le, 26/01/2019savez j' pourro pu vous en donner l' arcette, pasque quand qu in est jone , in s interesse te pas à cha .......
tout c'que j' m in souviens ché qu in mingeo cha souvent en fin de semaine au repas du soir , et pi in les finisso au momint du gouter le lendemain
c' que j in a comme souvenir, ch est que chéto eune pate qui avo été arpliée sur elle meme , et qu au miyeu yavo d la compote de pomme
enfin quand que j' dis d' la compote, pas d' la compote acatée toute faite, nan , d' la compote que m'mère ale vo fait avant....
savez la bonne odeur des pommes qui cuissent dans un fond d au et que cha parfume la cuisine ...
après m'mère ale infourno cha ,ch' est l'cas del dire, dans le four du fourneau
ale les avo plaché dans un plat qu ale avo mis du beurre d' dins pour que cha accroche pas, et pi ale arclaquo l' porte du four et chéto parti pour la cuisson
cuisson qu ale surveillo, car ché fourneaux cha donno pas toudis la meme caleur, et fallo raviser d' temps en temps sinon min père, du fond d' sin fauteul i dijo am' mère d eune façon gentile " té trouffe pas que cha sint l' brulé"....
c'qui faijo bondir m' mère d' sin canapé, là fallo pas rester dinch' passache pasqu ale parto, pieds en chasse neiche à "toute vitesse" dins l' cuisine......
meme qu in voyo bouger ché feules d' ché plantes d' la jungue qui yavo dins ché pieches traversées ........
et quand que m'mère ale sorto ch' plat et qu ale tiro sin nez, c'qui voulo dire que chéto un peu brulé sul' dessus, min père i dijo alors " et j espère que ch'est pas brulé" ...
c'qui faijo sortir m'mère d' ses gonds et qu ale li dijo, "t as qu à les faire" ou "j'suis pas d'dans" ........
in tout cas meme un tchiot peu brulé, yavo d'quo s' pourléquer sec