ché poubelleux

i passotent que la nuit éto cor là, yavo un girophare oranchesuch' toit d'la cabine que cha faijo des bios zeffets sur ché murs des masons ...

j' in su sur, pasque j avo ker m' lever , ouvrir duch'mint ch' rideau , pour pas et' vu et observer.....

tout cha pour vire ch' poubelleux mette la poubelle in plastique au cul du camion............

apppuyer such' bouton .............

faire baller à l intérieur d' la benne , (j m' attindo à c'qu ale qué d'dins , mais nan ale éto artenu)..................

la récupérer..... la faire rouler l armette such' trottoir et armonter su la barre arriere ,juste au momint du que ch' camion i ardémaro ......

cha m' semblo facile, mais j' peux vous dire que "ch' est un métier" , faut avoir la santé pour suive le rythme , et travailler par tous les temps ...

c'que j' vous décris là, chéto bin dans la seconte moitié des années 70, voire meme début 80.......

quand qu in a dit qu in allo standardiser la récolte des déchets, qu in allo avoir des poubelles à roulettes, j' me souviens qu' min père l avo apprécié ...

eune poubelle à roulettes , asteure cha parait évident , mais à l époque chéto eune sacrée amélioration ...

mais quand que ch' premier camion "moderne" y a v'nu dins la rue, in éto pas habitué au bruit que cha faijo...

savez le roul'mint d' la poubelle (bon cha ch éto normal) ...

mais à intinte le bruit du vérin qui monto et déchindo l' poubelle...

sans compter quand que l' broyeur d' la benne i s' metto en marche pour écraser au fur et à mesure ché déchets, cha nous a tous surpris ...

as' deminder si in croyo inochamint qu avec la modernité , in intindro pu rin du tout ...

mais chéto quand meme un sacré progrès ..

ouais pasque avant ch'éto pas la meme musique si in peut dire ...

ch'éto cor l époque des buées, in tout cas la fin , et dans chaque mason , in avo gardé ché lessiveusses ...

ch'est sur qu eune lessiveusse, cha avo 2 fonctions ...

d abord en tant que lessiveusse bin sur , mais savez au bout d un momint, à forche d' et' posée such' fourneau, ch' fond ou ché cotés in bas i devenotent plus fragiles...

alors d' lessiveusse, cha deveno eune poubelle .....

pas toudis pratique d' ailleurs .....

j' me souviens que quand que m'mère ale dijo à min père le diminche au soir " in va mette les poubelles" , chéto comme eune épreuve de force ...

faut dire aussi que si t additionno le poids d' la lessiveusse, pi tout c' qu in avo mis d' dans , ch'éto pas léger ...

pour ché personnes agées, solidarité oblige, souvint chéto ch' vigin, plus jone , qui allo les mette in place ..

"les " mette in plache pasque al mason par exempe i n avo au moins deux ..........

après chéto pas toudis aussi hygienique qu asteure, ou tout du moins té sinto plus les odeurs quand que tel' metto in plache .......

quand que ché poubelleeux passotent ,là ch'est sur fallo pas et' un méguerlot ... ou un fate ...

i zétotent à deux souvint pour monter l' poubelle au niveau du qu in pouvo l' baler dans l' camion ...

après faut dire que la lessiveuse eune fo vidée, ale éto plus fragile, et ché poubelleux souvint , j diro pas qui les jetotent à terre, enfin presque comme diro l aute ...

lessiveusses cabossées, sans compter la poignée du couverque, qui resisto pas longtimps ach' traint'mint là .....

in peut pas argretter ch'te périote, mais quand qu in ravisse asteure, in est arrivé , dans certaines communes à et' so meme ch' poubelleux ...

in a comminché par le tri du verre ...

pi aprés non pas à mette ché poubelles dins l' camion ,mais à faire ché tris, j ' conno d' zindrots du que ché gins i sont obligés d' sacrifier eune partie d' leur terrasse, vu qui zont 4 poubelles à roulettes asteure .......

ch'est la modernité , après , si cha peut qu i y a plus d' récupération, pourquo pas ?

cor que , y a d zindrots du que , in plus que té fais ch' tri ti meme, té payes cor plus cher la taxe poubelle ....

à méditer mes gins ...