y a 50 ans j'y a cru....

y a 50 ans j'y a cru à la conquête de l'espace...

faut dire qu'en à peine 10 ans, comme dijo ch' guss ," in a
invoyé eune souris, un cat, pi un singe, maint'nant ch'est tin tour" .....

ah sur qu'in i croyo à tout cha, faut dire qu'in suivo cha au poste, au transistor si vous préférez, avec les commentaires inflammés d' Albert Ducrocq ...

aujourd hui in est su la lune, demain in s' déplacera in fusée, tout in préparant les voyages sur Mars ou vers les anneaux d' Saturne ....

marcher su la lune, vire pour la première fo, de loin, la terre, depuis sin satellite, ch éto vraimint fabuleux ...

cha a même été la couverture d' not' livre d' géographie en 1971 quand qu in a rintré en sixième au collège ....

in y croyo à tout cha, ch'éto l'époque du que j' demindo à min père d' faire sin plein à mon d' chez Shell, pour avoir eune médale dorée de la conquête de l'espace ...

chéto l'époque aussi du qu'in a comminché à vire des ovnis partout

vous m' direz , comme nous in allo asteure su la lune, pourquo que ché martiens i viendrotent te pas nous dire coucou aussi....

in éto plein d'enthousiasme, mais comme in vous diro en "bio français" , j avo été "interpellé" par un dessin...

une bande dessinée, publiée dans le journal Pilote (les plus anciens ont connu..) , on y voyait des astronautes amerrir , être étonnés par l'indifférence générale de la foule rassemblée ...

"mais qui qu' vous zetes là" qui d'mande l'astronaute à quéqu'un du public, l'aute i li répond "in est là pour le 28 ème tour du monde de Bernard Moitessier" .........

j'avo trouvé qui poussotent le bouchon un peu loin ..... mais comme un soufflet, l'enthousiasme de la conquête spatiale il est vite arqueu ......

sur que par la suite, in a parlé des stations spatiales, mais que voulez vous, cha faijo moins rêver , vu qu in resto en orbite au d' sus d' nos tietes ...

ch'est pas d' tout cha que j'a l'plus de nostalgie.... nan, ch'est de m' dire que j' sais du que j'éto y a 50 ans jour pour jour vers 20h00, in marcho sur la route vers st Julien de Jordanne, au fin fond du Cantal, avec min père et m' mère

et j' raviso la lune, pététe qu'in raviso bin pététe qu'in pourro les vire ché astronautes ....