déchinte à la braderie
par minloute le, 06/10/2019la braderie chéto un jour espécial, et comme diro l'aute à jour espécial, mesures espéciales .......
djà qu'in bas aux quat' chemins de Labuissiere, yavo eune barrière et des panneaux qui conseillotent aux automobilistes qui voulotent aller vers Saint pol ou Hesdin, d' continuer direction Marles pour arjointe plus loin la rue Nationale .........
rin qu' cha cha filtro les passages, et quand qu'in déboucho in haut des grands bureaux, là yavo des barrières d' posées
in travers tout le long, avec un policier in faction such' devant
commint qu'in pourro nous décrire nouzautes in haut d'la cote ?
d'abord in éto les rois du monte, in éto 7 , comme ché 7 mercenaires ...
d'ailleurs in avincho comme cha , d' front , in avo eune sacrée allure, savez .....
belle rhabillure, caveux au vint, boutons d'acné sul' guiffe d' sortis....
eune sacrée dégaine savez, sans parler d' ceux du groupe qui avotent des fers à leu godasses , et qui s'arringeotent pour bin les claquer su ché pavés
cor que i n'a un qui avo voulu trop "faire sin fier" et qui s'éto artrouvé à terre .....
qui s éto rétalé su ché pavés glissants sous la risée des zautes .....
ah ché jones, qu in éto des moqueux d' gins ...
l'aute i s'arlevo , i raviso si s'rhabillure ale éto pas abimé, i artiro comme i pouvo ché traces d' berdoules , taleure faudra rinde des comptes en rintrant ........
i tiro un nez d' chinq metes, mais in avo pas l' temps d' braire sur li, nan, in éto in haut d' la cote ......
djà sul' déchinte yavo des étals, mais chéto plutôt des "fouffes"
c' qu'in appelero asteue un vide grenier........
yavo djà un peu d' monte, mais in voyo que quand qu'in sero in bas d' la cote, in avinch'ra pu comme in voudra .......
in passo devant ch' policier en bombant l' torse, mais in l' ravisant pas , savez in est con quand qu in est jone ...
rapid'mint in pouvo pus s'avincher à 7 d' front, ch'est pas que cha s' presso djà tant qu ' cha....
mais connaissez ché gins du nord, quand qui s' rinconte et si in plus cha fait un momint qui s' sont pas vus.....
faut passer en r'vue toute el' famile ...
"mon diu qu'ale a grandi", "i arsempe à sin père", "quo qui fait asteure" "i fréquente" .......
j'in passe et des meilleures, mais à forche que cha fait des ilots, in commincho à slalomer inter ché gins...
nous, in avincho in groupe asteure, quequ'fo in s'rintro d'dins, quand qui n avo un qui éto attiré par un stand
quequ' fo n'avo un qui faijo un croche pied à chti qui éto d' vant pour qui s affale sur ceusses de d'vant ...
chéto rigolo, quand que chéto pas vous la victime ...
pi aussi quequ' fo fallo faire attintion yavo des "grands" qui étotent là et certains i pouvotent t'en artourner eune sans qu' tel vo arriver ....