devoir sur la braderie la correction
par minloute le, 07/10/2019on armonte ichi cor plus en arrière, in est à l'école Loubet, j'a calculé in devo et' en classe de CM1
j'em souviens dech' maite qui nous parlo d' la braderie le lundi matin
i nous d'mindo d' printe la parole pi d'raconter c'qu in avo vécu
pi i dijo, "bon j' vous sins d attaque, zallez faire eune rédaction à vos masons sur vot' journée à la braderie"
in li rind nos copies quequ' jours plus tard .......
ch' maite i éto pas biete, i corrigeo nos devoirs quand qu'in faijo souvent cours d' dessin ou qu'in devo faire les exercices du Bled
in l' raviso du coin d' l'eule, pasque i a des coups , i pouvo pas s'impecher d' réagir à c' qui éto écrit
quequ' fos tel' voyo sourire, voire rire, mais souvint in l' vo tiquer, souffler, raler
l' pire dins ché momints là ch'est si y accrocho ton r'gard quand que té levo l' tiete
teut' dijo, ch'est pour mi , j' va avoir eune mauvaise note jel sins .....
le jour qui corrigeo not' rédaction sur la braderie, cha a été un even'mint ......
ouais un even'mint .... in tout cas pour un, que j' conno cor sin nom mais que j' dira que sin prénom Jean Marc
in avo fini d' faire nos dessins, ch' maite i les zavo ramassés, les avo ravisé vite fait, levant les sourcils ichi, les fronçant par là .....
et vlà ti pas qui nous fait toute eune mise en scène pour rinte ché notes, et pour un coup i comminche par les plus basses .......
pour finir par les plus hautes .......
à chaque nom qui éto cité, si chéto pas l' tien, t'éto contint, même qu'à un momint té commincho un peu à souffler vu que t'éto sur d avoir au moins la moyenne .....
i distribue i distribue et à la fin i n'in reste pu qu eune dins ses mains .........
et là théatral'mint i félicite ch' fameux Jean Marc, qui pour un coup, et i insiste comme chéto exceptionnel, pour un coup i éto pas dins ché derniers , mais carrémint premier......
l'aute i savo pu d' où s' mette, savo pas si chéto du lard ou du cochon
ch' maite i le fait venir au tableau, va pour li donner son devoir , pi i s'ravise et i li dit
"té l'a écrit tout seul"? L' aute i devient tout rouche, "ouais" qui dit , mais pas trop fort
alors ch' maite i lit des passages à haute voix et d'un coup i li d'mande, ch'est quoi un........ "brocanteur" ?
j'vous passe les détails, mais j' l'arvo ch' fameux Jean Marc à essayer d'es' dépatouiller à trouver eune explication , seul tout seul sur l'estrade, face ach' maite, et pi à nous qu'in éto pas les derniers à ricaner ....
pour mi quand j'intinds "brocanteur" à coup sur ch'est lié pour mi au mot "braderie"