d' la viante rouche ....
par minloute le, 21/10/2019 "ben 2 bifteques" qu ale dijo l' femme à Omer ch' boucher, "ch'est del viante pour m' n'homme" .....
quand que l' femme ale dijo cha dinch' magasin, ch'est tout juste si ale nous prenno pas à partie ....
chéto tel'mint évident d acater du bifteque, cha allo donner les forches qui faudro à sin mari quand qui allo armonter du fond .......
del viante rouche ....ah mon diu, j ' va pas vous faire pourlequer avec cha, pasque quand que j éto tchiot ch'éto pas l' cas ...
in y busiant un peu, j' cro que c'qui m écoeuro , ouais in peut dire cha, ch'est que j avo l impression que l' biete ale éto pas cor morte ......
alors quand que m' mère ale in faijo du bifteque, quand que j' sinto la bonne odeur d' l ale qui cuiso dins l' payelle , j' savo qu' min calvaire y allo commincher ...
j a marqué la bonne odeur d' l ale , pasque si cha avo tenu qu à mi, té m auro versé que l' sauce , que j auro épongé avec ch' pain, que cha auro été qu' du plaiji ...
bin nan, fallo minger la viante avec...
oh j' sais m' mère ale mel metto tout c' qu ale pouvo pour m' donner ch' morciau l' plus cuit , mais fallo cor aussi l avaler
pasque quand que j' avo ch' morciau bin cuit, voir trop cuit, cha avo pas trop d' gout quand meme et chéto pas si facile qu' cha à machuquer
j intind cor min père dire " minge pas tant d' pain cha passera pas plus" ou " nin mets pas tant dins t' bouque in diro un écureule" ou "ché pas du chinegome, avale"
après j avo dro à "bo un coup" suivi de "bo pas trop , minche" ...
ah la la , un vrai chemin d' croix pour mi .......
sans parler du diminche quand que chéto poulet , mi j éto contint , mais quand que chéto rosbiffe , ch'éto la meme sérénate
cor que là , min frère qui n' avo djà avalé 4 tranches , i profito qu' min père i raviso pas pour m' printe m' tranche , tout cha avec un regard généreux , comme si im ' sauvo la mise ...
d un coté chéto vrai , et d un aut' coté cha l arringeo aussi
quand que j éto tchiot , langue ou gigot ? oh langue , et pourtant cha avo d' quo dégouter plus que du gigot, mais la langue la viante ale éto bin cuite ........
ah qui dijo min père, là y a pas b'soin d'dire quéquosse ....
asteure rosbiffe et gigot j in mingero sul' tiete d un teigneux
le bifteque....... in peut pas dire que j' m a paa amélioré , mais que si ch'est del bavette ou d' la hampe , et quand té vo ch' prix , teut 'dit que t as interet à bin mastiquer ..........
pourtant asteure, j' do arconnaite que l odeur d' l ale qui cuit dins l' payelle, cha m' fait toudis arvenir quequ' décennies en arriere, quand que j' longeo les masons à portes battantes d' la rue D Anzin