i vont arvenir ch'est sur ....
par minloute le, 23/02/2020Bruay , rue Raymond Deruy, à mon Gérard , ch' coiffeur ....
cha y est ch' magasin Carrefour y a ouvert à la future Porte Nord ...
avec ses galeries marchandes ...
ch' éto l' momint charnière que les zhabitutes des gins allotent canger .......
un grand magasin du qu in fera bientot toutes ses courses... que ché ménagères ale zarreteront d' faire tous les jours le trajet "boulangerie, boucherie , épicerie, marchand d' légueumes " le long de la rue Anatole France
meme celles qu ale zont pas d' moyen d' locomotion, ale ziront un coup par semaine faire ché courses au supermarché ...
pasque y aura toudis quéqu un del famile qui s'proposera pour el' conduire en carette .......
ch' est l' momint du qui a eu les premieres deffections en centre ville ...
des magasins qui ont comminché à s installer la bo, d abord en gardant ché 2 enseignes ...
pi rapid'mint en s installant definitiv'mint à Labuissiere ...
in in est pas cor à construire tout autour pour profiter d' l affluence
mais on sint que ch'est en train d' canger .....
j' attindo min tour au salon d' coiffure, et Gérard i raconto qui avo été raviser ch ' nouviau salon qui y éto installé ...
à l acouter, in s' demindo si ché jeunettes qu ale coiffotent ale zavotent fait un bep coiffure ou espace vert ...
cha coupo n importe commint, parait , selon li, que ché clients i zallotent arvenir ché sur .......
i n a un dans l' salon, qui avo certain'mint plus d'répartie que les zautes, qui li répond
"dis donc Gérard, quo qu' ch est qu' té faijo là bo ? té faijo tes courses aussi?"
"ben ouais" qui répond Gérard
"alors si ti té vas ach' magasin, i n a qui peuvent aller s' faire couper les caveux aussi non ?"
ouais qui répond Gérard ,mais les caveux ch'est pas parel .....
la conversation ale s a arrétée là , faute d arguments .....
m' mère ale a vite fait sin compte et rapid'mint ale a cangé ses zhabitutes d' achat
djà qu ale acato à mon Libéral qui éto eune superette du coté d'la gare ..
là j 'me souviens qu ale avo fait sin calcul avec ch' ticket d' caisse, prenant min père à témoin
"la viante à tel prix l' kilo" , "la boite de petit pois à tel prix" .......
ché commerçants du coin ont comminché à tirer leu nez
d' abord , j éto là, ch' marchande d' beurre qui passo, eune fo payée ale li dit " ch'est l' dernier coup qu' j in prinds , j a trouvé beauoucp moins quer "
l aute ale a vanté que chéto des zoeufs d' glaines d' cinsier, mais m'mère ale a pas cangé d avis
pas longtemps après en arvenant del boulangerie ch'est ch' boucher qui a sorti sur sin pas d' porte , ale li a dit qu ale avo trouvé sin compte ailleurs ...
cha a été l' début d' la fin pour grinmint d' commerces d' la rue
ch' boucher Omer, la mercerie Defernez, le coiffeur Noel, le marchand de légumes Lecigne, chez Nen ........i zont pis cha d' plein fouet
y a la boulangerie qui a cor été épargnée , pasque acater du pain in allo pas printe l' carette tous les jours pour y aller
pi à l époque , ch' pain , chéto cor quéquosse, le pain industriel i avo pas bonne réputation .....
et pi y a ch' marchand d' légumes qui a tenu l' coup, oh sur qu en volume y a perdu, mais comme i faijo que des biaux légumes, ché gins i zy passotent cor régulier'mint
en écrivant cha, j a l impression , pour ché plus jones, d' parler d un temps qui yauro cor eu des dinosaures ...
asteure, allez d'minder à ché tout jones d' vous dire quo que ch'est eune boucherie
pour eux, bin ché del viante in barquette sous plastique vendu dins ché rayons
ainsi va la vie