TINCHON quincaillerie

Après le SPAR, y’ avot l’ boutique Tinchon, chétot eune quincallerie. Mais là aussi, que quincallerie ! Té poussos l’porte et té t’artrouvos devant eune grande allée centrale bordée d’étalaches et d’armoires à tiroirs qu’in n’in véyot pas l’bout ! Cha continuot tout drot jusque dins l’ arrière boutique pis cor dins l’cour … Par terre chétot du biau carrelache marron clair et marron foncé et cha sintot l’cuir là-d’ dins ; pis cor plein d’autes zodeurs d’ résine, d’ caoutchouc, d’ térébenthine…. Y’ avot jamais la foule passe que chés gins i zacatotent moins d’affaires qu’asteure pour bricoler. Ché pas qu’i bricolotent moins, nan, au contraire, mais i zavotent des outils inusabes qui s’ passotent éd’ génération in génération. Et des pointes et des vis, i n’avotent des stocks dins des boites in fer qui zavotent récupéré à l’ fosse ou jé n’ sais dù …

Monsieur Tinchon i’ étot seul maîte à bord et i n’avot pas b’soin d’assistant. I’ étot toudis sapé dins eune grande blouse grise, sans poche in haut pou mette un crayon et un carnet pou chés calculs, li i n’avot pas b’soin, i calculot tout d’ tête. In l’ véyot pas souvint in train d’attinde ch’ client à sin comptoir qui étot à l’intrée dé ch’ magasin passe qu’i étot toudis occupé à quéque cosse

I’ étot toudis bien coiffé, souriant, élégant, aimabe avec chés clients ; i t’ sortot des questions ou d’ zhistoires qu’ té mettos chinq minutes à t’in r’mette. Y’ avot souvint du passage, minme des gins qui n’ vénotent pas pour acater mais juste pou l’ plaisir d’y dire bonjour ou d’ parler bricolache. Et là aussi, que puits d’ science ! I savot tout sur tout ; in cordonnerie, in menuiserie, in plomberie, in électricité, … Et in trouvot tout dins sin magasin, aussi bien des machins d’ l’ancien temps qu’ chés dernières nouveautés. J’y allos souvint avec min père et j’ les acoutos parler bricolache. Des boulons d’8 ; des clous sans tête, du fil à dénuder, du mastic … Des mèches pour és’ chignolle à main … Y’ avot pas core gramint d’outillache électrique à ch’ momint là. Chés nouviaux modèles i comminchotent à arriver et Monsieur Tinchon il les exposot au mitan d’ sin magasin : des scies électriques, des percheusses, des martiaux piqueur … Des tondeusses à gazon jé m’rappelle pas ; j’ cros pas qu’i in vindot passe qu’ à Bruay, dins chés gardins, y’ avot pas cor d’ pelousses : chés gins i cultivotent des légumes et dins chés catiaux des Houillères, i zavotent des jardiniers.

In allot aussi i acater des boutelles éd’ gaz pou’ l’ gazinière qu’in a eue pus tard. Cha chétot eune vraie corvée ; in savot jamais à l’avanche quand chétot qu’alle allot quère in panne ; et comme un fait exprès, chétot justemint souvint l’ diminche, que m’ mère alle comminchot à cuire ses frites à midi dins l’ marmite à gras d’ boeuf , que l’ flamme alle comminchot à tourner d’ l’ oeulle pis à s’éteinde. Et l’ diminche, ch’ magasin Tinchon i’ étot fermé ! Mais, malgré qu’ chétot diminche, in pouvot essayer d’aller buquer à l’ porte d’intrée, ou d’aillonner l’ sonnette derrière l’ grille in fer, et monsieur Tinchon i vénot ouvrir él’ porte et armonter l’grille in fer pour passer in d’sous; i nous connaichot, et i s’ doutot bien qu’ in étot in panne éd’ gaz … Comme s’ caisse alle étot fermée, in écangeot juste l’ vide conte eune pleine et in allot payer l’ lundi …Cha chétot au début qu’in n’avot qu’eune boutelle, après in n’ avot toudis eune d’avanche.

Pour aller in quère eune pleine amont Tinchon, chétot pratique passe que chétot tout près à 30 mètes délle baraque. Mais avec mes frères, in s’ battot pas pou y’ aller !.. Malheureusemint ch’ trottoir i déchindot qu’alle étot vide et i’ armontot qu’alle étot pleine !... Soit in l’ portot à deux mains in s’arrêtant tous les trois mètes, soit in s’ mettot à deux pou l’ pousser et l’ faire rouler mais attintion à ch’ caniveau !

J’y allos des fos aussi pour racater eune ampoule, ou des fusibes in porcelaine qui zavotent fondu, pis des pointes. I n’avot des tiroirs et des tiroirs rimplis d’ pointes, d’ tous les sortes. Pis des vis. Des fers aussi qu’in clouot sur chés semelles éd souliers pour qu’alles s’usent moins ; des talons in caoutchouc à coller.

Y’ a eune paire d’années chétot ardév’nu eune cordonnerie à l’ ancienne ; et asteure, cha a l’air fermé ; l’ cordonnerie à l’ancienne, alle a déménagé à côté.. (Photos 1 et 2)

Des quincailleries comme cha, i n’in reste pus à Bruay ; l’ dernière alle étot quartier d’ la gare au 6 rue Louis Dussart, à côté dé ch’ passache à niveaux. OUTILLAGE / QUINCAILLERIE BLIDA : l’ boutique là alle avot été fondée par Éliane et Robert Blida in 1954, l’année dé m’ naissance ! J’y ai été y’ a deux ans qu’alle étot cor ouverte, j’avos été servi par eune vielle femme qui avot l’air d’ bien s’y connaîte ; et sin magasin cha m’a rappelé chti d’ Monsieur Tinchon : tout in longueur parelle qu’in n’in vot pas la fin, des comptoirs in bos, des tiroirs tout partout, eune vraie caverne d’ Ali Baba… mais l’ dernière fos qu’ j’ai passé d’ vant cha avot l’air fermé aussi. (Photo 3)

Cha a fermé in avril 2019, que l’ femme Blida alle s’a décidé à profiter dé s’ retraite à pus d’ 80 ans ; et i zont quand minme eu l’honneur d’ un artique dins la Voix du Nord.

Comme cha i n’a pus des quincailleries à l’ancienne ; débarrassé d’ tous chés viéz’ries ! Plache au progrès ! Tous à Leroy-Merlin !

Mais ché pas à côté. In peut pas y’ aller à pied … Et in n’y va pas non pus pour faire élle conversation …