VERMELLE et DUCOURANT

VERMELLE et DUCOURANT

Deux magasins qu’in trouvot après l’ pâtisserie Boucly, toudis in déchindant l’rue Alfred Leroy in allant au lycée. Juste avant Opigez, l’ maroquinerie dù qui vindotent des sacs à main, des carnasses, des gants in cuir, des valises … Dins les années 70, i zavotent chédé eune partie dé ch’ bâtimint à Serge Gorczyca qui avot pu ouvrir eune librairie « POINT VIRGULE », qu’ j’in parlerai dins min prochain artique. In attindant, Vermelle et Ducourant, j’ vas pas in dire grand cosse passe que jé m’ rappelle pas y avoir mis les pieds…


VERMELLE fromage

L’ boutique-là, chétot eune crèmerie, qui vindotent aussi du fromache. Chés marchands, in les aperchuvot derrière élle vitrine, i zétotent habillés avec eune blouse blanque comme à l’ hôpital. I n’a gramint qui z’in parlent dé l’ boutique là mais mi j’ m’in rappelle pas. J’ai jamais dû y aller. Du lait, y’ avot l’ marchande ambulante qui passot dins ch’ coron avec eune camionnette et qui mettot eune boutelle devant l’ porte tous les jours au matin d’ bonne heure ; et du fromache, à part du Hollande (mimolette) , du Saint-Paulin et du Gouda qu’in acatot au SPAR ou à ch’ marqué du vendredi, in in mingeot pas gramint passe qu’in n’avot rien pou l’ conserver, à part dins l’ cave. Et pis du fromache cha coûtot déjà quère à ch’ t’ époque-là aussi.

Alors si i n’a qui s’in rappellent dé l’ crèmerie Vermelle, qu’ i prennent ém’ plache pou raconter …


Bonneterie DUCOURANT , Marchand d’ capiaux

Eune grande vitrine avec des capiaux posés sur des tiêtes éd’ mannequin derrière, pis des casquettes et des bérets devant à l’étalache … Ch’ magasin là, j’peux pas in dire grand cosse non pus passe que personne dins m’ famille i mettot un capiau. Ah si pépère , dins chés grandes zoccasions, mariaches, interremints. Jé m’ rappelle qu’ des fos quand i vénot avec s’ quate chevaux (4CV) , i’ in profitot pour aller faire un tour dins chés magasins passe qu’ à l’ Bussière dù qu’i habitot y n’avot pas, et i allot à ch’ magasin d’ capiaux non pas pou n’acater un neuf mais canger ch’ ruban qu’i mettot autour : un gris perle pour un mariache, un noir pour un interremint …

In y vindot sûremint aussi des casquettes pis des bérets ; mais j’ cros qu’min père i acatot les siens putôt à ch’ marqué, qu’ chétot moins quère

Pis un béret, comme chétot inusabe, y’ avot pas b’soin d’in racater …