LIBRAIRIE POINT VIRGULE

Dins l’ temps, comme librairie, y’ avot que l’ librairie Beghin, ch’ dernier commerce à ch’ coin avant ch’ lycée qu’ asteure ché un laboratoire d’analyses médicales ; l’ librairie Dambrine rue Henri Cadot dù qu’in acatot chés cahiers d’ vacances MAGNARD et pus tard l’ grande librairie du Lycée, DUPONT in face du « bahut ». L’ librairie Gorczyca alle a fait s’ n’ apparition dins les années 70, in 1974 précisémint, à coté dé l’ maroquinerie OPIGEZ, « Madame Soleil » ; d’ailleurs alle a été construite su l’ mitan dé ch’ magasin là ; alle s’appelot « POINT VIRGULE ». Alle étot toute in longueur et in y trouvot délle vraie littérature et des lives qu’in n’aurot pa vu dins chés zautes librairies, que minme àmont Dupont in aurot eu du mau à les commander … Un coup j’ cachos « Point du Jour » d’ André Breton et j’étos allé amont Dupont mais personne i connaichot ; eune vindeusse m’avot proposé un live d’Auguste Le Breton ! Pas grand cosse à vire. Alors qu’au Point Virgule, in étot su l’ minme longueur d’onde. Et surtout in pouvot discuter avec ch’ libraire, Serge Gorczyca, d’ poésie, d’ littérature, d’peinture, d’ philosophie. Chétot un passionné et un érudit. Quand alle a ouvert, j’avos pus b’soin d’aller in stop à Lille au Furet du Nord, j’ commandos mes lives à sin magasin.

Serge Gorczyca i étot prof éd’ français et j’ cros qu’i avot démissionné ou pris eune disponibilité pour ouvrir sin magasin, nan, pas un magasin, un liu d’ rincontes et d’ écanches. I avot eune barbe noire assez founie, chétot pas si courant qu’asteure à ch’ momint là. In pouvot y’ aller juste pour discuter, sans minme rien acater ; et à chaque fos in quéyot sur des profs, des amis, des écrivains, des artistes. I’ organisot des séances éd’ dédicaces avec des écrivains, jé m’ rappelle d’ Christian GERNIGON pou sin premier roman « Kilomètres immobiles » … Pétête un coup aussi, après l’ sortie d’ « Bruay-en-Artois ou Bruay-en-Poésie », eune réception avec à boire et à minger. Par la suite i faijot aussi galerie d’ peinture, pour exposer d’ zartistes d’ Bruay et des zinvirons comme Pascal BARBE ….. Des réceptions comme cha, i n’avot souvint l’ vendredi soir ou l’ samedi après-midi. In pouvot rintrer minme sans carton d’invitation, in étot sûr d’ y faire des belles rincontes. L’ librairie Gorczyca chétot pas qu’eune librairie, contrairemint à Dupont ou à Dambrine. Chétot un liu culturel, un liu d’ rinconte pour des gins avides éd’ connaissances. I avot pas cor d’ maison d’ la culture alors cha in faijot office.

L’ librairie là, alle a duré l’ temps qu’alle a pu, 3 ans ; passe que chétot bien biau des idées modernes, mais cha rapportot pas grand cosse. In étot à Bruay, à deux pas d’ chés corons, ville ouvrière, et pas à Béthune. Cha i l’ savot mais chétot aussi un pari qu’ i voulot faire j’ pinse. S’ n’ idée alle étot grande, belle, et généreusse mais alle a dû buter sûremint sur des « dures réalités zéconomiques » …

Jé n’sais pus vraimint quand ni pourquoi qu’alle a disparu ; in tout cas alle a pas été rimplachée ; in 2009, chétot un magasin d’ décoration. Dupont i’ allot bétot fermer. Dambrine chétot pus qu’un souvenir ; et Beghin i’ avot disparu d’pis longtemps. Pus d’ librairie à Bruay ; pus d’ lives … Ah si ! à Cora, in pouvot cor in trouver, et les mette dins sin caddie intre chés boites d’ lessive, chés paquets d’ macaronis et chés packs éd’ canettes … Chétot pus des lives mais des bouquins, pour « bouquiner », quand qu’in sait pas quoi faire ; mais pus des lives comme in in trouvot amont Gorczyca, des lives qu’in cachot dins chés rayons, qu’in désirot vraimint, qu’in commandot quand in les trouvot pas, qu’in in discutot avant minme dé z’avoir lus, qu’in étot à l’ presse dé z’archuvoir, pis qu’in étot aux zanches quand in rintrot dins l’ librairie comme cha, in passant, et qu’i dijot « Ah ! tu tombes bien ! Ton livre est arrivé, je l’ai reçu ce matin » …

L’ librairie alle s'appelot "POINT VIRGULE" ; j’y avos pas prêté attintion à ch’ momint là, sans doute trop jeaunne pour in saisir tout chés subtilités. In y arpinsant aujourd’hui, jé m’ rinds compte qu'un "point virgule", ché bien, cha délimite un insembe qui est pas fini, laichant eune ouverture , eune suite à l'imagination ; ché pas comme un point, li qu’ ché définitif, qui laiche pus d’plache à l’ discussion. Avec un point virgule, l’ phrase alle est pas finie, alle reste à compléter. A l'image dé l’ librairie là dù qu’in pouvot apporter tout autant qu’ chu qu’in vénot y quère ; eune espèce d'auberche espagnole dé l’ culture. Ch’ nom, chétot déjà un cadeau de bienvenue à chés gins qui passotent él’ porte; i zallotent sûremint trouver chu qu’i cahotent ; mais cha s’ rot à eux après d’ continuer ch’ l'histoire ...

Merci Monsieur Gorczyca, d’avoir apporté de la lumière, de la couleur, et des horizons nouveaux ; vous avez marqué nos jeunes esprits avides de nouveautés, d’avant-gardes, d’expériences nouvelles ; vous n’étiez pas un commerçant parmi d’autres de cette rue Alfred Leroy ; vous aviez une place à part. Que j’ai gardée bien au chaud, au panthéon de mes souvenirs. (photos 1 et 2 Serge Gorczyca en 1976 et l’ex librairie Point Virgule en 2009 (photo streetview))