PARFUMERIE DELERCE
par berlens78 le, 02/07/2020Amont Delerce qu’ chétot eune parfumerie, j’avos rien à y faire ; rien de rien ; sauf élle velle d’ Noël, qu’avec mes frères in s’avot creusé l’ chervelle pour savoir quo qu’in allot bien acater comme cadeau à m’ mère et qu’ souvint, qu’in n’avot rien trouvé, i restot pus que ch’ flacon d’ parfum. Quo qu’in aurot pu y acater d’aute ? Un tablier ? pas pour Noël ! un robot ménager ? chétot putôt pou l’ fête des mères …. Nan, quéque cosse rien qu’ pour elle … Eune robe ? chétot risqué, in savot pas trop ses goûts ni s’talle … Un collier ? alle in mettot jamais ; ah ! si ! eune broche ! Mais bon min père i y’ in avot déjà acaté eune l’année d’avant ; pis dû qu’in trouvot cha, des broches ? ah pétête amont Opigez …
Bon, in va aller faire un tour au Cercle, vire chés vitrines, et in aura pétête eune idée in route … Opigez : y’avot des foulards et des sacs à main in vitrine ; ah ! cha, cha aurot pu ête bien , un foulard… ou un sac à main … Un nécessaire à couture mais alle avot déjà tout ; et pis l’ velle éd’ Noël, ch’ magasin i fermot d’ bonne heure.
In va vire à Prisunic, in trouvera pétête quéque cosse … Mais là aussi l’ velle éd’ Noël, cha fermot d’pus bonne heure que d’habitude ; bon y’avot pus grand cosse d’ouvert comme magasin. Et ché là qu’in quéyot devant l’ vitrine délle parfumerie DELERCE, in plein mitan du Cercle, tout allumée, qui restot ouvert tard ch’ jour là pour chés femmes éd’ riches qui vénotent mette eune dernière touche éd’ peinture et parfumache avant leu réveillon.
Dins l’ boutique là, in peut pas dire qu’in y rintrot franco ; j’ étos minme pas trop rassuré ; des femmes bien coiffées, bien habillées et qui sintotent bon comme cha, j’in véyos pas souvint. Mais l’ patronne alle vénot à l’ porte nous dire éd’ rintrer. Alle parlot français comme dins chés lives, avec plein d’ manières ; alle commandot tout s’ n’ armée d’ vindeusses à l’ baguette. Chétot eune vraie fourmillère là-d’ dins, avec és’ reine et chés zouvrières in blouse blanque ; et tout cha évoluot dins des nuaches éd’ parfums … L’ patronne alle avot eune robe avec un biau décolleté et des escarpins à talons hauts . In s’ faijot tout pétits pour rintrer dins l’ parfumerie, qu’y avot jamais d’ hommes, qu’ des femmes qui nous ravisotent arriver in nous toisant du haut in bas. L’ lumière alle étot blanque et intense, y’aurot pas fallu avoir eune taque su sin pantalon ou des godasses sales, in aurot tout d’ suite passé pour des loqueteux !
L’ patronne alle étot aux pétits soins avec nous, alle in véyot pas souvint des garchons ; « alors, comme çà vous voulez faire un beau cadeau à votre maman pour Noël? Un parfum ? une eau de toilette ? Un coffret ? tenez ! nous en avons justement un spécial pour Noël … » ; à vire ch’ prix marqué d’ sus, in manquot d’ s’ énoquer … « Euh ! … bin …. » « Attendez, je vais vous faire sentir ; tournez votre main » et alle prénot min poignet, in vaporisant d’ sus du parfum frais ; « Attendez un instant, laissez sécher … alors ? qu’en pensez-vous ? çà devrait lui plaire , c’est « Fragrance » de … » « Euh … oui … çà sent bon ; c’est combien ?.. » « Attendez en voici un autre, qui conviendra peut-être mieux ; elle a quel âge votre maman ?.. » …
Et in essayot comme cha toutes sortes éd’ parfums et d’ iaux d’ toilette ; j’armontos à chaque coup un tiot peu plus mes manches sur min bras drot, pis min bras gauche, au d’sus, in d’sous , sur les côtés ; à la fin y’ avot pus d’ plaches libes, alors alle vaporisot sur sin pognet à elle pou me l’ faire sintir …
Bon chétot bien biau tout cha, mais bon, avec min frère, in comminchot à s’ raviser in s’ demandant pour combien qu’in allot n’avoir … « Et c’est combien celui-là ? … » « Ah oui, quand même … vous n’avez pas un peu moins cher ?... » « Oui mais alors on change de catégorie, on va plutôt s’orienter vers les eaux de parfum» ...
Finalemint, in in cusichot eune pas trop quère, avec un biau flacon et surtout eune belle boite ; si chétot vraimint pas quère, alle passot l’ relais à eune vindeusse qui finichot d’ nous faire chés paquets. Alle nous faijot un biau papier cadeau avec eune pétite fichelle dorée , qu’alle passot l’ tranche d’un ciseau d’sus pour in faire des tortillons ; alle mettot ch’ cadeau dins un sac un papier DELERCE avec des poignées, in rajoutant des échantillons. Et un dernier coup d’ vaporisateur parfumé su ch’ sac… « Je vous ai mis quelques échantillons aussi, pour votre papa ou vos grands frères si vous en avez ; ils ont quel âge ? » « Merci m’dame au r’voir m’dame ». Alle nous raccompagnot à l’ porte pour nous l’ouvrir avec un grand sourire et des courbettes comme si qu’in aurot été des milords (L’ patronne ou putôt eune vindeusse si in n’avot pas acaté pour gramint).
In sortant d’ là, i faijot nuit, tout i’ étot fermé et l’ plache du Cercle alle étot déserte ; tous chés gins i zétotent dins leus maisons à préparer ch’ réveillon d’ Noël. In cocotot comme des maguettes, pas seulemint d’ sur nos mains mais aussi d’ nos mantiaux qui s’avotent imprégnés d’ tous chés zodeurs délle boutique ! Mais heureusemint y’ avot pus grand monde dins chés rues à ch’ t’ heure là pou s’ foute éd’ nous ! …