Luis Mariano...
par minloute le, 02/10/2020j in vo qui vont dire , minloute y est pas gentil, escusez me d avinche pour la suite, chéto eune réflexion d infant d' eune dizaine d' années ...
et qui faudra attinte l age adulte pour comprinte s' n attitute ....
j avo eune dizaine d années et in allo régulier'mint en région parisienne vire eune tante à min père , eune demie tante si in voudro et' précis ..
mais vu l' volume chéto bin eune tante à part intière ..(cha y est cha comminche, j' vous avo prévenu..)
ah mon diu que j avo pas ker y aller, m' mère non pu d ailleurs...
min père i li allo pasque chéto , à part sin cousin, l' seule personne qui le lio cor à sin passé .....
ché pour cha qui éto indulgent .....
avec m' mère j' l a dit in y alo à reculons .....
faut dire qu ale avo toutes les qualités, et j exagère en rien.....
méquante, radine , égoiste, toudis à critiquer ché gins, qui so des' famile ou pas d ailleurs...
j a dis radine, mais chéto pire qu' cha , ch in éto presque maladif , à profiter d' faire ché ménaches ché des gins pour utiliser ch'téléphone, pi faire ses commissions ..
faire ses commissions dans l 'sens qu ale y allo pour faire ses besoins quand qui zétotent pas là, comme cha ale tiro pas l' chasse as' mason.....
faire ses commissions aussi, en barbotant par chi par là, c' qui pourro l interesser .........
ale éto veuve, et n avo pas eu d infant, cor heureux pour li ......
dernier exempe , yavo des poires mures su ché zarpes, bin interdiction d' les cueillir, fallo finir d' minger ché poires blettes, ou attaquées par ché guepes ...
zavez vu, un monstre d ' gentillesse ch'est l' moins qu on puisse dire ...
et j' do dire que du haut d' mes 10 ans , ale m avo étonné un coup .....
chéto un après midi et i passotent un flime à la télé, exceptionnel'mint ale l avo alleumé , pasque chéto eune opérette avec Luis Mariano ...
j' nous arvois dins l' pieche sombre, mal assis su des cayelles bin dures qui avotent du et' souples avant l invasion d' mai 40....
mi cha m interesso pas, ch' genre d' film, des roucoulades, eune histoire d eune banalité , mais fallo rin dire, pas commenter , pasque la tante ale t auro tué ...
chéto sin Luis Mariano, l' sien, ale si méquante , j' la raviso du coin d' leule , pasque le spectaque y éto pas su l écran mais dans la salle ..
d'la vire comme cha, s' comporter comme eune gamine, sin mouchoir dinss' main...... à canter en meme temps que Luis.........
mon diu qu ale avo eune voix d' crécelle .......
j' la voyo verser eune tchiote larme d' temps en temps ...
cha cha m étonno, commint un "monstre" comme cha , cha pouvo avoir un coeur ?????????????
cha y est, enfin, le mot "fin" apparait su l écran, in attind la fin du générique qui défile pour s' lever, la tante ale veut in profiter jusqu au bout ..
et ch'est sur durant chinq mineutes après , ale parait plus gentile, mais rassurez vous, cha duro pas plus