chapelle Sainte Barbe

pitit, dans les années 60, le diminche in avo dro à aller à la messe.....

j' dois dire que ch'est pas un mauvais souvenir pour mi, in allo à la Chapelle Sainte Barbe à Bruay, ch'éto commint dire, eune tchiote églisse... ou eune grante chapelle ...

yavo plusieurs "services" ch'est l' cas d' le dire, nous in allo à la messe du diminche, la grante, celle de la fin de matinée .......

vague souvenir de "l'ancien culte" , savez quand que ch' prêtre i nous tourno l' dos l' plus souvint , pi qui devo parler grinmint en latin ...

pi j'a connu, ch' nouviau, du qu' le prêtre i nous raviso durant la messe , pi surtout qui parlo en français toudis .........

su la droite de l'autel, y avo sur eune grande dalle d' ciment accrochée ach' mur, les paroles du "Notre Père".......
j'suivo bin ché paroles et avec tout l' monte j récito tout en j'tant un neule d' temps en temps vu que cha m arrivo d'cor hésiter ...

su la droite, y avo eune toute pitite statue de Sainte Barbe, la patronne d' la chapelle , et d' l' hôpital qui éto juste à coté
in avo not' plache, oh pas comme dans l'temps du qui yavo ché noms des gins su ché cayelles, mais in s'metto toudis su la droite, au bord, comme cha min père i pouvo allonger s' gampe raite ..

autant j hésito parfois sul' Notre Père, autant ché "canchons" , j' les savo par cœur, même qui parait que j' canto fort et faux bin sur , mais au moins, in pouvo pas dire que j' participo pas ...

suive la messe ch'est un peu, si j'osero dire, un jeu d' cayelles musicales .....

arleffe te, arbaisse te, arleffe te, sauf qu'à la fin in frotto pas s' bedaine sur celle d' Philomène comme in dit dins l' canchon ...

aut' momint espécial, vers la fin, quand que ché zadultes i zallotent querre l' hostie, qui faijotent la queue ...

mi j'y avo pas droit, vu qu' j avo pas fait cor fait m' communion, j' savos pas l' gout qu' cha pouvo avoir , mais à vire les tietes qui faijotent ché gins en arvenant d' l'autel , am'mote qui devo y avoir d' l' huile d' foie d' morue d'dins ,,,,

bon après quand que chéto la Noël, quand que j'avo dro, vu mon age, à minger l'texte "joyeux Noël" qui yavo sul' buche, in m a dit que l' hostie chéto parel comme gout,,,

cha m'avo pas laissé un souvenir imperissape , t'as l'impression d'minger du papier ,,,,,,

à la sortie d' la messe, ché cloches i s' mettotent à sonner jusqu'au jur que j'a appris que chéto un disque, ah j'a été déçu,,,,,

sortie d' la messe, ch'est aussi tout l' monte serré comme des sardines, et ch'est l' momint du que ché gins i comminchent à babeler intre eux , quitte à freiner l' passache
in d'minte des nouveles su la santé,,,,, on s' propose d'vous zarmonter en carette ,,,,

j'allo dire tout l' monte i s' connaisso, in tout cas d'vue chéto sur vu que chéto là qu' ché gins du quartier i s'artrouvotent
la chapelle ale éto pleine, chéto fin des années 60 ,,,,,

asteure ch'est même pu eune chapelle, cha avo été racatée par la mairie
et l église Saint martin parel, ale est freumée aussi,

autre temps autres mœurs qu in dit ,,,