PEPERE partie 3 sur 3

A nouvel an, tout chés éfants et pétits-éfants i s’artrouvotent à s’ maison pour li souhaiter eune bonne année eune bonne santé. Cha in faijot du monde ; y’avot pas assez d’cayelles , alors in s’asseyot cor eune fos sur les g’noux des zuns et des zautes ; tout l’ monde i parlot in minme temps, in s’intindot pus. Et dins l’ pétite pièche à l’intrée in pouvot minme pus y aller tellemint qu’y avot d’ mantiaux, d’ pardessus et d’imperméabes. Au bout d’un momint, pépère i d’mandot à s’ fille d’aller quère chés zenveloppes avec chés sous d’dins, et tous chés noms marqués d’sus ; i n’oubliot jamais un et y’avot pas eune seule faute d’orthographe. Ché li qui les distribuot in appelant chés prénoms, comme à l’école quand chés instituteurs i faijotent él’ distribution d’ bons points et d’imaches. Chacun i allot quère s’ n’inveloppe sans l’ouvrir et i arpartot s’assir dins sin coin ; in s’artournant discrètemint pou l’ décacheter et raviser que couleur éd’ billet qu’ y avot d’ dins. Après chétot soit eune grimace, soit un clin d’oeulle. Tout l’ monde y’ avot s’ n’inveloppe , dé ch’ pus viux jusqu’à ch’ pus jeaunne. Pis tout l’ monde parelle, qu’ y avot pas d’ chouchou.

Quand y’ a comminché à y’ avoir des télés in couleur, i’ est vénu n’acater eune amont Chalmin ; et i nous a donné s’ vielle in noir et blanc ; j’étos contint ; in avot l’ télé ; j’ pouvos raviser tous les jours « Ivanhoé » ou « l’homme du Picardie » ; pis « Belphégor » l’ samedi soir qu’ cha m’donnot des cauchemars pour tout l’ semaine !

Avant cha, y avot acaté eune auto aussi, eune 4CV ; et pour cha i’ avot passé sin permis qu’i devot avoir pas lon d’ 70 ans ; d’un seul coup i découvrot la liberté, pouvoir aller dù qu’i voulot, quand i voulot. Alors i débarquot à l’ maison comme cha à tout bout d’ champ, qu’ personne i l’attindot ; li i’ étot pas du genre à buquer à l’porte et à atteinde qu’in viinne l’y ouvrir ; i tapot dins l’ porte avec s’ canne et i rintrot franco in criant d’eune voix tonitruante « CHÉ MI !!! », i rintrot dins l’ cuisine, posot sin capiau su ch’ coin dé l’ porte, s’ canne conte éch’ mur et i s’asseyot à l’ tabe ; « quoi qu’ vous voulez grand père, eune tasse éd’ café ? Un verre éd’ vin ? » qu’alle i d’mandot m’mère. I restot pas longtemps ; chétot histoire éd’ dire bonjour pis d’ faire un tour.

Avec s’ n’ auto, i pouvot aller tout partout quand cha li prénot l’invie ; sin rêve à li chétot d’ faire la route Napoléon dins chés montannes des Alpes, et i l’avot fait. Pis un coup y a eu un accident qu’ i est passé in d’sous d’un camion, li pis s’ n’auto qu’alle a été décapitée ; i s’a artrouvé à l’hôpital un bon bout d’ temps ; mais i n’a réchappé là aussi, comme i n’avot réchappé d’ Verdun et du chemin des dames. Un viux de la vielle ; un dur à cuire … Mais y’ avot quand minme eu du maux à n’arvénir et j’ cros qu’après cha i pouvot pus conduire. Alors ché s’ fille qui vénot avec.

I a continué à vieillir comme cha jusqu’à presque 90 ans. In vieillichant, i’étot moins dur, i s’étot humanisé ; i étot plus à l’ écoute d’ chés jeaunnes ; quand j’ sus vénu l’inviter à min mariache avec ém’ future femme, i m’a pris à part pou’ m’ donner des consels … Chétot in 80, six mos avant qu’ i passe l’arme à gauche. I’ avot fait tout l’procession à l’mairie pis à l’église (vire élle photo) . I avot ténu tout ch’repas et i’ avot minme canté 2-3 canchons, dont l’ fameusse « canne à loupettes » que rien qu’à ch’ nom, tout l’ monde i s’ tordot d’ rire. Mais li i cantot, imperturbabe, comme si qu’i étot sur eune scène ; chétot des canchons interminables, comme « la romance de Maître Patelin » … ; alors au bout d’un momint, y’ avot pus personne qui l’acoutot ; mais li i continuot, jusqu’au bout, debout, bien drot, les ziux fixés sur él’ line bleue des Vosges … Et quand chétot fini, un bon vingt minutes après, y in restot quand minme toudis un pour sé n’aperchuvoir et commincher à applaudir. Et après chétot un déluche d’ applaudichemints , d’ éclats d’ rire et d’ complimints … Li, i’étot du temps qu’y avot pas d’ tourne disques et pas d’orchestes, que chétot chés zinvités qui faijotent le spectaque, et qui poussotent la chansonnette chacun à tour éd’ rôle … Tout le monde i cantot, surtout chés zhommes ; et min père y’ avot minme un carnet d’ canchons avec tous chés paroles écrites avec des blancs intre chés strophes (vire chés photos d’ Pépère à min mariache in avril 1980)

Quand i’ est mort, y’ a eu du monde à s’ n’ interremint, enfin des jonnes passe que des viux d’ la vielle comme li, y’ in restot pus gramint … Y a eu l’ messe à l’église dé l’ Bussière avec chés charitabes ; pis ch’ cortèche jusqu’à ch’ chimetière. Personne y’a vraimint versé des larmes mais tout l’ monde i’ étot triste, comme si qu’ chétot pas quéqu’un qu’in interrot mais eune page d’ histoire complète, toute eune époque.

Pendant des années, ses éfants i zont continué à s’occuper dé s’ tombe, mette chés chrysanthèmes à l’ Toussaint ; pis eux aussi i sont partis, s’tombe alle étot d’ moins in moins fleurie. Et asteure, y’ a pus qu’ chés plaques et eune paire éd’ fleurs artificielles ; et pus grand monde pou s’ rappeler d’ li. Pis un jour y’aura pus personne.

Ché comme cha.

Chés souvenirs i sont pas plus éternels que chés gins