RETOUR À BRUAY (La fin des vacances à Berck . Épilogue)

Voilà , chés vacances à Berck alles zétotent finies ; au matin, mes parints y zavottent ringé pis nettoyé l’ location ; j’étos allé eune dernière fos à la mer et j'avos gardé min maillot d' bain plein d’ sabe sur mi. j’allos devoir attinde un an pour arvénir et vire la mer. Autant qu’ j’étos contint et plein d’entrain in arrivant, autant j’étos trisse et abattu in arpartant. Monter dins l’autobus in arculant ; rester sin nez collé sur l’ vite à raviser au loin dins l’ vague, à raviser rien. Chés gins qui juotent aux boules dins la gare. Chés contrôleurs in maillot d’ bain. Chés vagues qui vénotent mourir su ch’ quai in important chés valisses, chés pelles, chés zépuisettes et chés séiaux… un ballon qui s’in allot dins la mer … « mais dépèches-te, coeurres, va l’ rattrapper ! » et pourtant y s’ passot rien ; j’étos comme paralysé. Collé sur min sièche à raviser mes souvenirs.

In prénot l’autobus éd chinq heures l’ diminche après-midi. Jé m’ muchos dins un coin pour pas faire vire mes larmes. Rang du Fliers, attinde que ch’ train y passe, qui pouvot bien aller au diabe. Montreulle, j’ déchindos minme pas. Hesdin : « allez, viens, in va aller minger eune frite su’ l’ plache, in a l' temps mais faut quand minme és' dépécher, ch’ bus y s’arrête qu’eune demie-heure ».

Après cha, l’ grand route à toboggans, et pis saint-Pol, qui comminchot à faire noir, que j’ véyos pus rien par elle vite rimplie d’ buée, qu’un pauve jeaunne qui étot trisse à mourir et des zautes derrière qui s’étotent indormis. Arriver à Bruay, tous chés lumières éd’ chés cafés, chés gins qui sortotent du cinéma ; faire el’ tour éd’ prisunic, déchinde chés marches éd l'autobus Dumont , toudis in arculant ; j’ séros bien resté caché tout au fond intre deux banquettes, qu’ peutête y arpartot après à Berck … Mais quo’ qu’ j’auros fait là-bos tout seux …

Armonter l’rue Alfred Leroy avec chés valisses qui voulotent pus avancher non pus ; chés magasins toudis fermés. Chalmain pis l’ rue d’ Divion : Ah ! Mémère !... Alle attindot à l’ porte avec ch’ tchien dins ses bras qui gesticulot in poussant des cris comme un diabe dins l’iau bénite… Ah ! min tchien ! j’ t’ai quère ! té m’as manqué té sais ! Mémère alle pouvot pu l’ ténir, ch’ tchien y sautot par terre in courant tout partout après les uns et les zautes, y savot pu dû donner délle truffe …. Y pichot tout partout tellemint qu’y étot contint d’ nous arvir ! …

In rintrot, mémère alle avot préparé à souper pis mis l’ tabe dins l’ salle à minger ; in n’allot pas minger dins l’ cuisine quand minme ! Chés valisses in les déballerot pus tard ; raconter chés vacances à mémère, chétot un tiot peu les arviffe, mes ziux y s’rallumotent, j’arvénos à la vie ; min tchien in d’ sous dé m’ cayelle y m’ léquot mes zortelles plein d’ sabe…

L’ fos chi in avot tout raconté, chétot fini pour du bon chés vacances à Berck ; y’ allot falloir commincher à pinser sérieusemint à l’école pis à l’ rintrée. Et atteinde chés photos qu’ min père y allot aller amont Crendal pour rinde ch’ l’apparelle qui nous prétot tous z’ans pour chés vacances avec eune pellicule. Un grand merci pour cha Monsieur Crendal ; y n’a pas gramint qui zont pu faire des photos d’ leus vacances à Berck in ch’ temps-là. Chés photos là, j’ pourrai les raviser tout m’ vie ; et quand j’ s’ rai mort, j’ voudros qu’ mes cheindes alles restent pour toudis mélangées à ch’ sabe

DELLE PLAGE ÉD’ BERCK

(carte postale panoramique de la plage)

1 photo correspondant au texte