ché cintres in bo

Après ché fêtes , Manman ale in profito pour faire ch' tri dins ché vet'mints...

Trop pitits pour mi.... (min diu i va nous minger sul' tiete chtilale)

Pour les zaffaires d' min père, m' mère ale savo i faire, ale dijo pas "j' va t' jeter cha" ..

Sinan min père i répondo recta " nan, nan , cha peut cor servir " ...

Ale li dijo " Léonce in va aller en ville pour t'acater un nouviau mantiau, chti chi i comminche à donner des sines d' fatique"

I zavotent ker aller à mon Marchand Frères pi aussi à mon Georges Paul

Eune fo, ch' mantiau acaté, m' mère ale in profito pour faire un tri plus strique des affaires à min père, (ale faijo cha quand qui éto pas là )

Comme cha quand qui cacho après plus tard, et qui li d'mindo du que chéto rangé , ale li dijo "bin j' la j'té , vu que j' t'a acaté ch' mantiau"
..........

Quand que Manman ale faijo ch' tri j' resto souvint dins l' coin pour récupérer ché vieux cintres in bo...

D 'ailleurs i zétotent rimplachés par ché cintres en plastique, ah le tout plastique, chéto le top d' l'époque ...

Suffijo qui so un peu cassé et j' el récupéro, alors j agrandisso ch' trou du qui yavo ch' crochet in fer ....

J'allo dins l' cour , j'el metto à l'horizontal d' vant mi , pi j' faijo tourner ch' cintre in bo, comme si chéto eune hélice et j' courro , dech' gardin al' mason et del mason au gardin

Comme eune hélice d'avion que j' dijo, chéto vraimint cha

Faut dire qu'in avo grinmint d'imagination, ou qu'in voulo juer au flime "la bataille d'Angleterre" .......

Avec ché spitfires qui combatotent ché merchech'mites

Grand flime que j'avo eu l' dro d' raviser à la télévision , aux dossiers de l'écran

Asteure allez donner un cintre à un tchiot d'asteure, i vous ravisero d un air ...