Les jardinsché cartes d' Saint Nicolas
par minloute le, 10/12/2022mon diu que j' l avo ker cht' périote d' l année ..
djà que j avo eu min cadeau pour la fete d' Saint Eloi......
qu' arrivo dans la foulée Saint Nicolas ......
Saint Nicolas, commint dire.... comme chi chéto l envoyé du Père Noel ...
comme chi chéto eune fête pour qu in s' prépare, si le fallo, à celle d' la crèche , d' l'enfant Jésus..mais surtout d' tous les bios joujoux qu in a vu en rêve .......
Saint Nicolas, meme si yavo pas d' cadeaux à la clé , yavo eune magie ...
la magie d' guetter ch' facteur et d aller vire al' boite si in avo archu ché fameuses cartes postales avec le liseré "Saint Nicolas" .....
D'ailleurs, si quequ' jurs avant in passo au magasin d' à mon d' chez Defernez , "mercerie, papetterie ...et accessoires funéraires" , j' arluquo du coté du présentoir à cartes et j' "étonno" d' in vire in présentation ...
comme pour pas qu ale oublie ...
ah l' premiere carte archue ....
chéto souvint celle d' em'tante, pi après intr ' autres celle d' Madame Thueux eune ancienne collègue d' traval à min père, celle d' Clara ,l' cousine à min père sans oublier celles d' mes soeurs ....
quand ché cartes arrivotent , j' les metto bin en évidence such'devant du buffet
comme pour dire, ravisez tout c'que j ai archu ...
al' reflexion, chéto cor l' carte d' eme mère que j avo l' plus ker, pasque , et cha m étonno un tchiot peu, ale faijo l effort d' m in invoyer eune par la poste ..
invoyer eune carte à s' mason in mettant un timpe, au lieu simplemint d' el donner tout simplemint ...
ch'te pitite attention, avec le temps, "j' cro bin" que chéto eune grante preuffe d affection ....
