la charcuterie du coin ....

le jeudi ch' éto charcuterie ......

papa i allo dans l aprés midi à mon del charcuterie qui yavo à Bruay dans la rue Florent Evrart , pas loin du dispensaire et d' la belle au bois ...

chéto un tout pitit magasin, quand que j éto tchiot i m éto arrivé d y rintrer avec m' mère , et pour mi i devo pas vinte grand cosse vu qui yavo pas grand cosse d' exposé dins s' vitrine

in plus ché teno plus d' l échoppe que d un vrai magasin, d'dins si yavo la plache pour 4 clients chéto bin l amérique .....

pitit magasin, mais grand charcutier, min père i avo ker i acater ses patés, paté d' viante avec sin bord du qui yavo comme du saindous , paté d' foie avec sa gelée qui faijo gligli quand qu in l' toucho avec sin coutiau .....

mon diu, les samedis au soir , à minger ché patés avec des pétotes à l iau, des grands cornichons coupés in quate dins ch' bocal, sans compter ché grands oignons hollandais qui avotent séjournés parel dins in bocal ....

papa in plus i avo ker l andouillette, et là fallo l' vire quand qui en avo acaté et qui rintro al' mason..

i les montro tout d' suite am' mère , oh ale avo compris qu' min père i auro pas attindu samedi au soir pour les minger ..

ouais vendredi al' mason chéto pichon au midi et oeufs au soir

pour in arvenir à ché andouillettes : recette toute simpe avec d' zéchalottes , pi eune portion d' frites , mon diu i éto as' n affaire comme in dijo alors ........

pi un jur ch' charcutier y a pris s' retraite, y a un nouviau qui y a arrivé , mais ché patés et l andouillette chéto pas les memes, as' deminder comme dijo min père si zacato pas à mon Cora ........

d ailleurs ch' magasin là y a vite freumé , et ché gins i zont artrouvé leur bonheur soit au marché , ou avec ch' charcutier d' labuissiere , qui li aussi éto un vrai charcutier ..