la vieille dentellière

LA VIEILLE DENTELLIÈRE
SOUVENIRS ET REGRETS
Alexandre Desrousseaux

Mad’lon !' doyenn' des dintellières,
Laut' jour in r’muant ses broq'lets,
Parlot d'ses joie' et d' ses misères,
A pus d' vingt jeune gins rassemblés.
Ell’' récomparot les jours de s'viellesse,
Au pus biau temps des amours de s'jeunesse,
Ell' rappélot ses plaisis,
Ses chagrins, ses sou cis,
Et répététot toudis :
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« A quinze ans j'étos joliette,
On m' répétot vingt fos par jour
« Mon Dieu, Mad'lon, qu' vous êt's bien faite !
Vous avez tous les traits d' l'amour.
Et quand on vous vot marcher,
J' vous assure
Qu'on n' décess' point d'admirer
Vo' tournure...
Vous êt's comme un postillon,
Qui trottin' tout au long
De l' fichell' d'un dragon... »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« Vous avez l' voiss' d'eune alouette.
Quand vous cantez, quand vous parlez,
On crot intinde eun' clarinette
Qui ju' l'air des pus biaux couplets.
Dins vos yeux noir' et brillants
On s' pourmire ;
Vos orell's garni's d' pindants
On admire ;
Et l' moindre d' vos amoureux,
Pour eun' mèch' de vos ch'veux
Donn'rot chin qu'il a d' mieux. »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« Ch'étot l' bon temps des dintellières,
On gaingnot d' l'argin' à ruffler,
Aussi, j' n'avos point des berlières,
Comme à ch't heur', pour mi m'habiller.
J'avos des grands farbalas
Les dimanches ;
Des biaux p'tits lis'rets lilas
Sus mes manches ;
Des faveur' à mes sorlets,
Cocarde' à mes bonnets,
Des bas d' soie à mes pieds. »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« A vingt ans j' m'ai mi' in ménache
Avec un homm' biau comme un coeur.
Aussi j' peux dir' que no' mariache
A mis tout l' canton in ameur.
Nous avons fait nos quinze tours
In caroche,
Et pindant pu d' huit grands jours,
In bamboche,
Dins Lille et dins les fourbous.
On n' rincontrot pus qu' nous
Marchant bras d'sus bras d'zous. »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« Mais par malheur, j'ai resté veufe
Avec tros infants su' mes bras.
Mon Dieu ! mon Dieu ! queull' triste épreufe !
Pus d' plaisi, gramint d'imbarras
Min vieux garchon, d'puis longtemps,
fait l' penoule ;
M' fill', qui n'a point vingt-chinq ans,
Est eun' droule ;
Hélas ! et l'aut' garchon qu' j'ai,
Volant faire un congé,
D'hier est ingagé. »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!

« Me v'là donc vielle et presque infirme,
N' gaingnant pus d' quoi mainger du pain.
Heureus'mint, l' pauverieu m'affirme
Qu'on ma'ttind au Bleu-Tot dès d'main.
Quand j'arai là mes habits
D' cotonnette,
On rira bien d'mi, si j' dis
Qu' jeun' fillette,
Pour mieux fair' mes imbarras,
J' portos des farbalas
Et d's écourcheux d' taif'tas. »
Pour éloingner chéull' vielle his¬toire,
De m' mémoire.
Trottez, trottez mes p’tits broq'lots.
Trottez, trottez !!