Croqsoris

CROQSORIS
ou LA NOUVELLE MÈRE-MICHEL
d' Alexandre Desrousseaux

J'avos mis m'n amour sur eun' biête,
Un cat qu'j'appélos Croqsoris.
Il étot pus rar' qu eun' comète
Avé s'gross queue et ses poils gris.
Mais des brigands d'min voisinache,
A les Rois, volant fair' féstin.
Ont pris cheull' pauve biéte au liache..
Pou l'main-ger in guiss de lapin.
Chés méchant's gins ont tordu l'cou
D'min biau matou,
D'min gros minou,
Qui faijot si bien miaou ! Miaou

Et quand il' on' eu commis ch' crime,
Chés vrais vauriens, chés gins sans coeur,
Sont v'nus m' vir, et m' dir', pour la frime
« Brav' femm', nous plaingnons vo' malheur. »
Su' l' temps que j' perdos m' voisse à braire,
Il' ont pindu à min rideau,
Comme un graingnard d'apothicaire,
L' tiête d' min cat par sin musiau.
Chés méchant's gins ont tordu l'cou
D'min biau matou,
D'min gros minou,
Qui faijot si bien miaou ! Miaou

Veyant dins cheull' postur' cocasse
L' restant d' Croqsoris, qu' j'aimos tant,
J'ai poussé eun' longue esclamasse,
Au point d'arrêter chaq' passant.
J'ai pris dins mes mains cheull' pauv' tiête,
Je l'ai bajé' comm' du bon pain,
Et, pou' l' conserver, j' l'ai fait mette
Din' un grand bocal d'esprit d' vin...
Queu malheur, on a tordu l' cou,
D'min biau matou,
D'min gros minou,
Qui faijot si bien miaou ! Miaou

Croqsoris faijot mes délices,
Par tous les p'tits tours qu' i' m' juot.
Il avot des drôl's de caprices
Quand j'avos de l' viande, i' m' l'inl'vot ;
Si par hasard j'oblios d' mette
Eun' couverture à min pot d' lait,
J'étos bien sûr que ch' petit traîte
S'in Trot bien vit' l'avaler.
Queu malheur, on a tordu l' cou
D'min biau matou,
D'min gros minou,
Qui faijot si bien miaou ! Miaou ...

Comme il aimot les friandisses,
J' li faijos mainger à tous r'pas,
Du fi, du pomon, des saucisses,
Et même d' l' andouillett' d'Arras !...
Chaq' jour, infin, ch'étot ducasse,
Je n' savos qu' faire pou' l' régaler,
Quand l' matin j' buvos m' petit' tasse,
J' li donnos m' tablette à chucher...
Queu malheur, on a tordu l' cou,
D'min biau matou,
D'min gros minou,
Qui faijot si bien miaou ! Miaou

Pour li j'avos l' coeur d'eun' bonn' mère
Quand il étot bien ingavé.
Je l' vettios, et j'étos tout' fière
D' vir que s' panch' ramonnot l' pavé...
Heureux comme un p'tit coq in pâte,
Car i' n' manquot jamais de rien,
Il a pourtant, juant de l' patte,
Un jour croqué min canarien...
Queu malheur, on a tordu l' cou,
D'min biau matou,
D'min gros minou,
Qui faijot si bien miaou ! Miaou

Malgré ses p'tits défauts, j' vous jure
Que j' donn'ros gros pour mil' ravoir...
J' vodros qu'on punich' de l' torture !
Cheuss'-là qui faitt'nt min désespoir !
J' vodros les vir din' eun' guéole,
Pindant tros heure' au pilori,
Et leu marquer su' chaque épaule,
Chés mots, avec un fier rougi
« Chés méchant's gin' ont tordu !' cou
D' m'in biau matou,
D' min gros minou,
Qui faijot si bien miaou
Miaou!! »