El traval i est pas toudis récompinché
par Ch'Zio le, 02/02/2006En complèment au sujet "Frein à l'ascension sociale n°5"
A l'école normale i fallot travailler dur pour décrocher ein' mintion au bac qui nous permettrot ed' continuer plus long. Ches études du soir al' s'étotes pas toudis assez longues pour apprind' tout c'qui fallot savoir.
Comme j'avos ein' prise ed' courant à côté d'min lit au dortoir, j'avos rapporté ein' pétite veilleuse avec un long fil qu' j' branchos d'sus. Cha m'permettot ed travailler in d'sous d'mes couvertures, sans m'faire vir d'ech pion. J'auros aussi pu prindre ein' lampe ed poche, mais ches piles ch'étot trop querre pour mi.
Min voisin d'lit, min camarade Ch'Map, i a voulu faire comme mi et i a aussi rapporté ein' lampe et ein' rallonge. Mais i devot pas ête trop fort in électricité et i a ramené ein' ampoule trop grosse.
Alors, ein' nuit, i s'est indormi avec s'lampe allumée in d'sous d''ses couvertures. Cha a mis l'fu à sin lit. In a réussi à l'étindre avec nos couvertures mais i avot ein' ed ches finquères !, et j'dis pas l'odeur. Et comme in n'a pas pu mucher ch'matelas, i s'est fait prindre el' lendemain matin.
Cha y a valu ed' passer in consel ed discipline et i a manqué d'peu d'ête rinvoyé.
Mais l'pire ch'est qu'in nous a copé l'courant su nous prise et qu'in n'a pus pu travailler dins nous lit , jusqu'aux longs jours du mos d'juin.