min compteur électrique étot monté à l'invers
par Ch'Zio le, 21/02/2006J'ai toudis eu ein' passion pour l'électricité. J'avos à peine treize ans qu'jétos chef ed l'équipe des électriciens à mon d'ches préjoc ed l'abbé Leblond. Avec mes montaches ed bricoleux, ches fusibles du presbytère Sainte Barbe i z'avotent souvint sauté, au grand désespoir ed Mademoiselle Marie, s'gouvernante.
J'avos hâte d'apprind' l'électricité, pour miux comprind' cho qu'ej faijot. Mais, pour cha, i a fallu atteind' l'classe d'troisième. Là, j'ai appris qu'i avot un fil ed phase et un fil ed neutre et qu'ch'étot pas parel'.
Alors j'ai fait ein essai : j'ai branché ein' lampe intre l'fil ed phase et l'prise ed terre de ch'poste ed T.S.F. Cha a marché : el lampe al s'allumot. Mais i avot plus fort: in ravisant ch'compteur, j'vis qu'i tournot pas! J'ai alors compris que l'compagnie d'électricité al avot branché ch'compteur à l'invers : ch'étot l'fil du neutre qui alimintot les bobinages de ch'compteur et, comme je n'l'utilisos pas, cha ne l'faijot pas tourner.
Cha allot m'servir plus tard ( vir " Les restrictions d'électricité pindant la guerre).